Nune'e, Sekretariu Estadu Komunikasaun Sosiál (SEKomS), Expedito Loro Dias Ximenes, husu ba Sekretariu Estadu Asuntu Toponomia no Organizasaun Urbana (SEATOU) atu respeita monumentu saudozu Sander Robert Thoenes tanba ninia kontribuisaun makaas ba Timor-Leste ninia prosesu luta libertasaun.
"Tanba ita-nia kolega jornalista ne'e nia kontribuisaun makaas ba ita-nia prosesu luta libertasaun, mak ha'u mós sei husu ba SEATOU atu respeita ba iha kolega nia monumentu ne'ebé iha Becora nia ne'e" dehan nia, iha Palásiu Governu, horisehik.
Nia dehan, parte SEKomS sei halo dialogu ho SEATOU, nune'e bele muda monumentu saudozu Sander Robert Thoenes ne'e ho dignu.
"Ita tenke halo kolega saudozu jornalista ne'e ho dignu, ha'u hetan ona informasaun no ha'u sei ba hasoru SEATOU atu bele haree took, ita bele halo oinsá se bele monumentu ne'e halo mudansa ita tenke muda ho dignu tanba ninia kontribuisaun ba iha ita-nia prosesu luta libertasaun liuhusi área informasaun ne'e makaas, di'ak no respeita no tau nia iha fatin ne'ebé dignu", nia informa.
Purtantu, estrada husi Kuluhun-Becora agora ne'e ho nia luan metru 12 to'o 16 no sei alarga to'o 23,74 ho nia kompozisaun rua mak estrada liman loos ho metru ualu, liman karuk ualu, médiu ka klaran metru ida hodi tau lampu iluminasaun.
Aleinde ne'e, sentímetru 80 ba halo bee-dalan iha estrada liman-loos no karuk no metru 1,20 ba halo trotoár liman loos no karuk, ne'ebé sei hakoi mós fiu sira ne'ebé trankadu iha rai okos.
Xefe suku Kuluhun, Deus Dado Martins, hateten iha dadus provizóriu ba komunidade afetada ba alargamentu estrada ne'e hamutuk 36. Husi númeru ne'e konta ba baraka-oan, kioske ka loja, mebel, inklui rai privadu.
Nia hatutan dezde uluk komunidade Kuluhun koopera no la halo protesta, maibé sira husu mak Governu tenke halo indemnizasaun ba sira-nia fatin.
Aleinde ne'e, xefe suku interinu Bekora, Luís do Carmo da Silva, dehan komunidade afetada ba alargamentu estrada husi suku Becora-Kuluhun, Bekora-Kamea nia dadus provizóriu iha uma-kain 170, maibé ba suku Bekora kuaze família 20-resin de'it, tanba maioria ne'e loja, ofisina, mebel, restaurante ki'ik sira no rentál ba fotokópia sira.
"To'o agora, Ministériu Obra Públika seidauk lori lista komunidade afetada sira-nia naran mai, nune'e foin lalais komunidade suku Bekora halo konferensia imprensa, tanba markasaun ne'ebé antes ne'e tau seidauk halo indemnizasaun, maibé MOP mai aumenta tan markasaun foun. Maibé, tanba dezenvolvimentu, komunidade tenke koopera. Estadu no Governu mós tenke konsidera sira-nia direitu", nia informa .
Suku Becora iha aldeia sanulu ho totál uma-kain rihun lima no populasaun rihun 24.
