Ministru Ensinu Superiór Siénsia no Kultura, José Honorio da Costa hatete, MESSK servisu hamutuk ho Vise Ministra ba Asuntu ASEAN hodi organiza konferensia ASEAN University Network (UAN).
“Ita konvida perítu na'in sanolu husi nasaun membru ASEAN mai atu ajuda Timor-Leste liu-liu iha kualifikasaun akademika no fahe esperiénsia oinsa mak ita bele hasa’e kualidade iha Timor-Leste," dehan Ministru iha salaun Delta-Nova, Tersa (18/03).
Governante ne’e dehan, hanesan nasaun foun presiza aprende, bainhira hakarak integra ba ASEAN, no rede ASEAN ne'e mós importante ba universidade sira iha Timor-Leste.
Tanba ne’e, Ministru José Hónoriu husu peritus sira atu suporta Timor-Leste iha atividade sira, liliu universidade no Institutu Superiór sira iha Timor hasa'e nia kualidade, atu nune'e ba oin Timor-Leste bele iha rekursu umanu ne'ebé kualifikadu iha área oioin.
"Worksop ne'e importante tebes ba nivel ensinu superiór nian tanba ne’e mak sira nain sanolu ne'e mesak profesor asosiadu ne'ebé hakarak fahe sira nia esperiénsia, ita mós konvida reitor sira husi univesidade hamutuk 19 mai partisipa hotu no entidade sira hanesan ECT, ANAAA sira mai atu bele rona no akompaña, nune’e bele halo polítika nasional ensinu superiór ida diak hodi serve ba timoroan sira hotu. Nune'e neneik bele sai kualifikadu hodi hele kompete iha rejiaun bainhira ita tama ona ba membru permanente ASEAN,” katak Ministru.
Adjuntu Diretór Ezekutivu AUN, Thanapan Lainprakobsup hatete, ASEAN University Network nu’udar aspetu ida ne’ebé nia papel importante atu hasa’e kualidade edukasaun ne’ebé exelente no kualifikasaun sira.
Primeiru-Ministru Kay Rala Xanana Gusmão hatete, Timor-Leste valoriza koñesimentu, kualifikasaun, no ensinu superiór nu’udar pilár fundamentál ba dezenvolvimentu sustentável nasaun nian.
Timor-Leste rekoñese papél vital ne'ebé instituisaun akadémika sira hala'o hodi forma futuru, influensia polítika sira (polítika di'ak sira), no kontribui ba sidadaun sira nia moris-di'ak.
Xefe Governu agradese públikamente ba Ministériu Ensinu Superiór, Siénsia no Kultura (MESCC) ba nia inisiativa hodi dudu prosesu konsultasaun no kolaborasaun ho Rede Universitáriu ASEAN nian.
"Ha’u iha konfiansa katak MESSK, servisu iha parseria ho dirijente universitáriu sira no membru dosente sira, ANAAA, no Rede Universitáriu ASEAN nian, bele garante kualidade no integridade husi ita-nia instituisaun akadémika sira no hadi’a kualifikasaun nasionál sira. Ami hakarak ami nia kursu sira no kualifikasaun sira ensinu superiór nian atu iha valór no rekoñesimentu, la'ós de'it iha nasionál maibé mós iha nivel internasionál," Dehan PM Xanana.
Enkuantu iha Seminariu Internasionál ne'e partisipa husi Reitor, Vise Reitor husi Institutu no universidade 19, ANAAA, ECT no seluk tan.
