Diretór Ezekutivu Aero Dili, Lorenço de Oliveira hatete, to’o ohin loron nia parte seidauk simu subsidiu husi governu ba vou aviaun ba Indonezia nian.

"Kona-ba simu fali subsidiu hodi ba Indonezia no fatin seluk, ha’u seidauk simu to'o agora. Deputadu Natalino hanesan deputadu parlamentu tenke koalia ho faktus. Ida ne'e ha’u seidauk simu no ida ha’u simu ne'e mak Oecusse nian, RAEOA mak fó mai, ha’u simu dala tolu, ha’u kontinua semo nafatin ba ne'ebá.”

“Deklarasaun ida Deputadu Natalino hatete ne'e la loos. Governu assina ona, maibé ha’u seidauk simu to'o agora, ida hau simu dala tolu ne'e husi RAEOA, ida dehan ba Bali ka fatin seluk ha’u seidauk simu to'o agora," dehan Lorenço.

Ba RAEOA, nia dehan, sira simu rihun $50, no tuir informasaun atu simu subsidiu kada fulan, maibé foin simu de’it fulan Juñu, Jullu no Setembru 2024. Enkuantu husi Outubru 2024 to’o Fevereiru 2025 la simu.

“Subsidiu $50.000 ne'e simu kada fulan, maibé komesa fulan Juñu to'o Setembru, ha’u foin simu dala tolu, liu ida ne'e ha’u seidauk simu buat ida husi Governu.”

“Ha’u simu vou domestika ba Oekusse loos de'it. Ha’u kontinua semo nafatin to'o agora, ne'e mós ha’u taka kost ne'e kada fulan ho montante $7.500, tanba semo ho $20 to'o $25 dollar la to'o selu kost. Pasajeirus 200 foin hetan $4 mill, se operasaun $7.500 halo oinsa mak bele to'o, imi konta de'it ba," dehan nia.

Ba vou internasional, Diretór ne’e hatete, nia parte seidauk simu doit metan ida husi governu.

"Atu hatete ba Deputadu Natalino katak ita-nia sorte ne'e tanba Singapura mak fó subsidiu boot liu fali, landing fee gratuita, parking free gratuita, fó tan $30 mil ba advertation, entaun oinsa mak orsamentu ho montante $7.500 ne'e ha’u bele taka fali ba Oekusse, fulan-fulan ha’u foti husi Singapura nian mak taka hodi aviaun ne'e bele halo operasaun nafatin.”

Iha oportunidade ne’e, Diretór ne’e mós kestiona deklarasaun husi Vise Ministru Asuntu Parlamentar, Aderito Hugo da Costa, kona-ba bilete aviaun iha tinan 10 liu ba.

"Loos duni ha’u mós perna sai ajensia, maibé Vise Ministru Asuntu Parlamentar haluha tiha buat ida katak inflasaun ekonomia iha mundu 3%, inflasi tinan-tinan, to'o agora sai hira ona? Inflasaun 3% to'o agora tinan 15 ona,” dehan nia.

Nia fó ezemplu, uluk gazolina bele sosa ho folin sentavus $0.70 to’o $0.80 kada litru, maibé daudauk ne’e ba ona dollar $1 resin.

Molok ne’e, Deputadu husi bankada apoiu governu, CNRT, Natalino dos Santos, kestiona ho folin bilete aviaun ne’ebé to’o ohin loron seidauk iha mudansa maske governu oferese ona subsidiu.

Deputadu Natalino hatete, bilete aviaun to'o agora kontinua laiha mudansa tan ne’e husu ba governu atu tau-matan.

"Preokupasaun ne'e ha'u foti kleur tiha ona kona-ba presu tiket ba aviaun Citilink ho aviaun Aero Dili ne'ebé karun tebtebes no husu governu atu haree tanba sa ita tau tiha subsídiu ba Aero tanbasa mak folin ne'e sa’e makaas ne'e," dehan Natalino iha ninia intervensaun iha plenária Parlamentu Nasionál, Segunda (17/03).

Aleinde subsidiu, nia dehan, governu halo ona despaisu ida katak Aero Dili atu hatama tan aviaun maibé to'o agora seidauk implementa.

Ba kestaun ne'e, Vise Ministru Asuntu Parlamentár Aderito Hugo hatete, asuntu ida ne'e envia ona ba MTK hodi haree.

"Ita hatene katak iha periodu uluk iha ita-nia tiket baratu to'o $78 ka $80 dollar no ba mai Dili-Bali ne'e kuaze $200 de'it mais agora (husi Dili) $200, entaun sei karun loos," dehan nia.

Governu, nia dehan, kontinua loke merkadu konetividade airlines nian barak liu tan hodi hein katak presu sei bele tuun automatikamente hanesan iha periodu balun iha tinan 2010 ba kotuk ne’ebé povu sei goza hela presu tiket ho folin baratu.

Aviaun foun

Tuir planu, aviaun foun Aero Dili ne’ebé sosa husi Alemaña no daudauk ne’e hala’o hela operasaun iha Xina, sei tuun iha aeroportu internasional Prezidente Nicolau Lobato, Komoro, Timor-Leste iha Sesta (21/03) ne’e.

Diretór Ezekutivu Aero Dili, Lorenço de Oliveira informa, aviaun foun ne’ebé aero Dili sosa sei to’o iha Timor-Leste iha 21 Marsu 2025, tuku 17.00.

"Aviaun Aero Dili foun ne'e sosa husi nasaun German, hala’o hela operasaun iha Xina mak ita ba foti, sei to'o Timor iha dia 21 (Marsu) iha aeroportu Internasional Nicolau Lobato Komoro tuku 17:00,” dehan na’in ba empreza Aero Dili ne’e iha nia knar, Timor Plaza, Tersa (18/03).

Ho prezensa aviaun foun ne’e, Aero Dili ninia operasaun sei luan liu tan hodi kobre nasaun sira hanesan Xina, Singapura, Australia no Tailandia.

"Aviaun Aero Dili foun ne'e sei halo nia operasaun ba iha nasaun sira hanesan Xina, Singapura, Australia no Tailandia, maibé prosesu ba Australia nian lao hela ona, dokumentu politiku ida mak seidauk kompleta, ida ne'e mak seidauk semo ba, lae ha’u halo ona inagurasaun ba Australia, posibilidade tinan ne'e semo ba ona ba Australia no to'o ba iha  Tailandia," nia dehan.

Emprezariu ne’e dehan, osan ba aviaun ne’ebé sosa ne’e husi ninia bolsu rasik.

"100 pursentu ha’u mesak de’it mak sosa aviaun ne'e, ema ruma hakarak sosiu mai ba, primeiro ha’u tawar ba Governu, (se) hakarak, ita kontente liu tan tanba ha’u mesak kobre aviaun haat, lima, ne'e la fasil, kobre ba Europa no Asia tomak ne'e ha’u mesak labele. Ha’u aguenta aviaun rua, tolu, maibé haat ba leten ha’u la aguenta, presiza tan maluk seluk ne'ebé hakarak investe.”

“Uluk aviaun ida ha’u la barani konvida, agora aviaun rua ha’u brani konvida ona, tanba nia administrasaun lao di’ak mak foin koalia ba ema, buat ida la di’ak ema ne'ebé mak hakarak hatama nia osan mai?," katak nia.