Ministru Asuntu Kombatente Libertasaun Nasionál Gil da Costa Monteiro “Oan Soru” hatete, MAKLN hamutuk ho CCLN nasional no Munisipiu, hala'o avaliasaun ba prosesu simu reklamasaun no kontestasaun durante loron 60 nia laran ne’ebé mai husi munispiu hotu no ministeriu mós haree konaba formas sira.
“Ami akompaña katak iha parte balun ninia dokumentus seidauk mai hotu entaun ami sei hare hela, seida’uk halo desizaun final, atu fó sai ba públiku kona-bá estensaun tempu oituan tan,” dehan Ministru ba Jornalsita sira iha salaun 3 Marsu Maubai, Komoro, Segunda (17/03).
Governante ne’e hatutan, iha artigu balun ne'ebé fó biban katak governu iha kompetensia atu halo prologasaun relasiona ho atividade sira ne’ebé seida’uk remata, presiza governu bele deside.
“Hanesan Ministru no Sekretáriu Estadu labele deside deit maibé tenki konvoka reuniaun ida ho Administrasaun CCLN, Preezidente ho Vise Prezidente para bele iha desizaun ida hodi fó prolongamentu ba asuntu sira ne’e,”dehan Ministru Gil.
Nia esplika, husi dadus rihun 30 resin, dadaun ne'e ekipa tekniku sira sei haree hela, hafoin remata bele fó sai nia rezultadu ba públiku.
“Mais, provizóriu númeru ne’ebé ha’u aponta, ita iha 30,305. Husi numeru ne’e, provizoriamente maioria barak liu, husi Munisipiu Ermera ne’ebé rejistu hamutuk rihun 3 resin,”tenik Ministru.
Iha biban ne’e, Ministeriu Asuntu Kombatente Libertasaun Nasionál (MAKLN) ho Konsellu Kombatentes Libertasaun Nasionál (CCLN sigla Portugés) husi munisipiu mós hahú buka solusaun ba dadus veteranus primeiru rejistu iha tinan 2003 ho 2005 hamutuk 4.758 ne'ebé durante ne'e pendente hela.
“Ami mós hare hela kona-ba dadus pendente sira ne'ebé mak 2003 no 2005 nian, ami koko hakarak aruma hotu dala ida para bele fó mós solusaun ba ida ne'e, tanba dadus ne’e kleur tebes. Reklamasaun no kontestasaun ne’e la prazu ka iha limitasaun ida, agora dadauk ami koko hakarak regulariza dala ida deit tuir regra no artigu 18 ne’ebé hatete katak regra mak ida ne'e, hotu-hotu tenki kumpri, no aban ba oin sei públika ba públiku," dehan Ministru.
Entretantu, Diretór Pensaun no Subvensaun Manuel Araújo dos Santos hatete, dadus reklamasaun ne'ebé rejistadu iha 2003 ho 2005 hamtuk 4.758.
Enkuantu, husi dadus primeiru rejistu ne’e, iha reklamasaun sira husi Munisipiu Aileu hamutuk 134, Ainaro iha 866, Atauro 15, Baukau 380, Bobonaro 488, Kovalima 448, Dili 307, Ermera 360, Lautem 71, Likisa 510, Manatuto 74, Manufahi 290, Oecusse 192 no Vikeke 667.
