Primeiru-Ministru hato’o deklarasaun ne’e hafoin hala’o enkontru ofisiál ho Sekretáriu Ezekutivu CPLP, Zacarias Albano da Costa, hamutuk ho reprezentante nasaun membru sira iha sede CPLP Lisboa, Portugal, kinta (17/10/2024).
Durante enkontru, Xanana Gusmão defende makas kona-bá esforsu hamutuk entre nasaun membru sira no kontinua apela atu sai hanesan promotór pás iha mundu no mós dezenvolvimentu globál.
“Iha CPLP sei iha esforsu hamutuk atu bele konkretiza no dezenvolve Kooperasaun ne’ebé asina hamutuk entre nasaun membru sira, nune’e bele alkansa objetivu komun hodi kria páz no harmonia”, dehan Xanana liu husi komunikadu ne’ebé Online INDEPENDENTE asesu, (19/10/24).
Xefe Governu Timorense ne’e hala’o vizita bá sede CPLP iha ámbitu vizita ofosiál bá Portugal desde loron 12 Outubru tanba hetan konvite hosi ninia omólogu Primeiru-Ministru Portugal, Luis Montenegro.
Estadu membru sira CPLP nian mak hanesan Angola, Brasil, Cabo Verde, Guiné-Bissau, Guiné Equatorial, Moçambique, Portugal, São Tomé e Príncipe no Timor-Leste.
Iha fatin hanesan, Sekretáriu Ezekutivu CPLP, Zacarias Albano da Costa hato’o ben-vindo no agradese ba vizita Xefe Governu Xanana no delegasaun membru governu ba sekretariadu CPLP no reniaun ho embaixador sira hodi fahe hanoin kona-ba paz ba mundu tomak.
Hafoin enkontru remata, PM Xanana tara tais no entrega livru ‘Ha’u Tasi, Ha’u Nia Timor’ ba embaixador CPLP sira nu’udar agradesimentu.
Entretantu, delegasaun Timor-Leste ne’ebé akompaña Xefe Governu maka Vise-Primeiru-Ministru no Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, Ministru Negósiu Estranjeiru no Kooperasaun, Bendito dos Santos Freitas, Ministru Justisa, Sérgio de Jesus Fernandes da Costa Hornai, Ministra Edukasaun, Dulce de Jesus Soares, Ministru Ensinu Superiór Siénsia no Kultura, José Honório da Costa Pereira Jerónimo, Ministru Interiór, Francisco da Costa Guterres, Sekretáriu Estadu Komunikasaun Sosiál, Expedito Dias Ximenes, Embaixadora Timor-Leste iha Portugal, Isabel Guterres, Embaixadora CPLP, Embaixadora Timor-Leste bá CPLP, Laura Abrantes no Xefe Gabinete PM, Elizabeth Exposto no delegasaun protokolu.
