Projetu Dekretu-Lei ne’e aprezenta husi Vise-Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Habitasaun Komunitária, Mariano Assanami Sabino, no Diretór Ezekutivu Unidade Misaun Kombate Malnutrisaun (Raes-Badak), Joel Maria Pereira.
Esbosu ne'e, propoin alterasaun dahuluk ba Dekretu-Lei Nú. 91/2022, ho data 22 Dezembru, kona-ba Unidade Misaun nian ba Kombate Raes Badak.
“Dekretu-Lei No. 91/2022 estabelese Unidade Misaun Kombate Stunting ho objetivu atu dezenvolve no implementa Planu Nasionál Kombate Malnutrisaun, promove koordenasaun entre ajénsia governu nian sira iha luta hasoru malnutrisaun infantil. Maski Planu Nasionál kompleta ona, medida barak ne'ebé trasa ona seidauk implementa tomak,”dehan komunikadu ne’ebé Online INDEPENDENTE asesu sesta (18/10/24).
Tuir komunikadu ne’e, atu garante kontinuasaun servisu importante ne’e, governu propoin atu hanaruk tan mandatu Unidade Misaun nian to’o loron 31 Dezembru 2030, hodi permite ezekusaun kompletu ba planu no redusaun taxa stunting iha Timor-Leste. Alterasaun ne’e mós ajusta enkuadramentu ministeriál foun ne’ebé rezulta husi IX Governu Konstitusionál nia estrutura, hodi koloka Unidade Misaun iha vise-Primeiru-Ministru no Ministru Koordenadór ba Asuntu Sosiál nia supervizaun.
“Objetivu maka atu garante koordenasaun ne'ebé efisiente entre departamentu sira governu nian no entidade sira administrasaun públika nian ne'ebé responsavel ba implementasaun polítika sira ne'ebé relasiona ho nutrisaun,”haktuir komunikadu refere.
Entretantu, molok ne’e, Konsellu Ministru aprova mós Planu Nasionál Anuál Multisetoriál ba Kombate Agradasaun ba períodu 2024-2030, ho objetivu atu hamenus taxa agravasaun no hadi’a saúde nutrisionál iha Timor-Leste.
Konsellu Ministru aprova mós akordu ida ho Banku Dezenvolvimentu Aziátiku (BAD) kona-ba medida sira atu hadi’a reziliénsia no subsisténsia iha área rurál sira. Akordu ne’e aprezenta husi Vise Primeiru Ministru no Ministru Dezenvolvimentu Rural no Habitasaun Komunitaria, Mariano Assanami Sabino. Ho objetivu atu hametin reziliénsia maizumenus ema 46,000 iha área rurál sira, partikularmente iha Munisípiu Manatutu.
Projetu ida-ne'e foka ba hadi'a asesu ba bee, promove adosaun prátika agríkola sira ne'ebé matenek ba klima, no hasa'e kapasidade institusionál no organizasionál sira iha komunidade rurál sira.
Aliñadu ho prioridade sira hosi IX Governu Konstitusionál, inisiativa ne’e inklui investimentu sira iha infraestrutura bee nian, formasaun ba grupu agríkola sira, no dezenvolvimentu meius subsisténsia diversifikadu no reziliente ba klima. Modelu dezenvolvimentu rurál ne’ebé implementa iha Manatutu hein atu replika iha munisípiu sira seluk, hodi haburas dezenvolvimentu sustentável iha Timor-Leste tomak.
Entretantu, Konsellu Ministru mós aprova projetu Dekretu-Lei ne’ebé estabelese Programa Revitalizasaun Komunitária, ne’ebé aprezenta mós husi Vise-Primeiru-Ministru Mariano Assanami Sabino.
Programa ne’e ho objetivu atu promove dezenvolvimentu sósiu-ekonómiku iha komunidade rurál sira liuhosi apoia atividade produtiva sira iha agrikultura, peska, pekuária, floresta, no hortikultura, no mós infraestrutura no ekipamentu komunitáriu ho interese koletivu.
Bazeia ba prinsípiu sira kona-ba sustentabilidade, inkluzaun sosiál, no partisipasaun komunidade nian, programa ne’e fó subsídiu ba projetu komunitáriu sira hodi hametin kapasidade lokál sira no hasa’e reziliénsia komunidade nian iha teritóriu nasionál tomak.
