PM Xanana hato’o kestaun ne’e bainhira halo enkontru ho CEO Kompaña Woodside, Meg O'Neil.
Tuir komunikadu imprensa ne’ebé Jornalista INDEPENDENTE asesu, iha enkontru ne’e PM Xanana hatete, governu Timor-Leste respeita nafatin Woodside ninia direitu hodi halo esplorasaun ba projetu mina no gas iha plantasaun Greater Sunrise.
Maibé, husu mós ba kompaña ne’e atu respeita Direitu povu Timor-Leste nian ne’ebé hakarak atu dada kadoras mai iha TL.
“Hasoru malu ho Woodside ami ko’alia liu kona-ba kooperasaun ne’ebé la’o ona no ha’u informa ba sira no sira mós hatene katak ‘Ministru Petroleu no Rekursu Minarais, Fransisco Monteiro, iha hele Perth Austrália no iha asuntu balun sei kontinua ko’alia ba malu’.”
“Ha’u husu de’it mak (Woodside) loke luan uituan imi-nia hanoin, ita ko’alia ba malu, respeita malu no ami respeita imi-nia interese, no imi mós tenke respeita ami-nia interese, hodi dehan ba sira katak buat ida kadoras atu dada ba Timór ne’e, ne’e ami-nia prinisipiu boot tebes ida dezde kedas funu,” deklara PM Xanana liu husi komunikadu ne’ebé INDEPENDENTE asesu husi media Gabinete PM, Kuarta (06/03).
Xefe Governu dehan, luta povu Timor-Leste nian ba fronteira maritima permanente manan ona, tanba ne’e Ministru Petrolinu no Rekursu Minarais, Fransisco Monteiro, kontinua servisu maka’as hodi koordena nafatin ho Kompaña Woodside no komisaun tomak ne’ebé envolve iha prosesu atu deskute asuntu ne’e ho klean liu tan.
Entretantu, durante enkontru, CEO Woodside Meg O'Neil agradese ba PM Xanana ne’ebé kontinua tau fiar atu servisu hamutuk.
Kompaña Woodside mós komprometidu atu servisu hamutuk nafatin ho Governu Timor-Leste hodi hala’o esprorasaun projetu minarai iha plantasaun Greater Sunrise.
Molok ne’e, PM Xanana mós hala’o enkontru ho Reprezentante Espesiál Governu Austrália ba Negosiasaun no Dezenvolvimentu Greater Sunrise, Steve Bracks, hodi diskute dezenvolvimentu projetu Greater Sunrise ne’ebé sei muda konseitu dezenvolvimentu rai rua ba futuru.
TL no Austrália mós sei hapara diverjénsia hotu-hotu iha pasadu, atu nune’e povu Australianu no Timor, bele haree futuru relasaun iha konfiansa boot no respeitu mútua ne’ebé boot liu.
