Tuir Xefe Governu ne’e, asaun ne’ebé Xefe Estadu halo hatudu ukun ho domin.

"Loos duni, ukun la'ós tu'ur iha fatin de'it konta osan ne'ebé simu, maibé ukun tenke ho domin.”

“Ita-boot (PR Horta) ohin iha tara tais hatudu ona ita-boot nia domin ba povu kiak. Halo uma iha ne'e, halo uma iha ne'eba, ajuda sira seluk tan, ne'eduni sai ezemplu di'ak tebtebes ba ukun-nain hotu-hotu, la'e iha ita-nia rain ukun ne'e dehan tuur iha palasiu, sai husi uma ho karreta fila fali, la hakbesik an ba povu.”

“Prezidente Repúblika hakbesik an ba povu, nia la'o tuun foho, ba to'o fatin-fatin. Ohin nia hatudu fali, bolu povu mai hodi sente katak Palasiu Prezidensia ne'e lá'os Ramos Horta nian, povu tomak nian," dehan PM Xanana bainhira partisipa iha selebrasaun Natal Povu ne’ebé organiza husi palasiu prezidensia, Sesta (22/12).

Xanana hatete, povu hili Ramos Horta sai Prezidente Repúblika atu servi no hatudu domin estadu nian ba povu tomak.

"Ita hili nia (Horta) atu servi, ita hili nia atu hatudu domin estadu nian ba povu tomak, tanba ne'e imi-nia domin ba Horta ka la'e," dehan Xanana ba partisipante sira.

Tan ne’e, Xanana afirma, nia apresia inisiativa PR Horta hodi lori labarik kiik sira no lori ema hotu ne'ebé presiza simu uitoan domin.

Entretantu, selebrasaun Natál Povu ne'ebé hala'o hamutuk ho komunidade 3.000 resin ne’ebé inkluziva.

Iha selebrasaun ne’e, fó mós biban ba vendedór lokál sira faan sasán no aihan tradisionál no nesesidade baziku sira.