Doutor Antonino do Carmo hatete, daudauk ne’e moras raiva iha ona Timor-Leste nia odamatan oin.

“Bainhira animal no raiva hatudu sinal ruma iha sosiedade nia leet, ita prezisa lori ba iha fasilidade saude hodi fó vasinasaun, ka animal ne'ebé mate labele han,” dehan Antonino iha Institute of Business, Sesta (22/12).

Atu evita ema labele hetan moras raiva, nia dehan, karik asu tata prezisa hamoos kanek iha bee torneira durante minutu 15, hafoin tau rinso no prezisa lori ba iha fasilidade saude durante oras 24 nian laran hodi hetan vasina raiva nian.

Atu raiva labele tama mai TL, nia hatete, meiu ida mak hametin  fronteira katak asu husi Indonesia labale tama mai.

Iha fatin hanesan, Administrador Postu Administrativu Maukatar, Munisipiu Kovalima, Constantinho do Carmo Cardoso hatete, sira-nia papel ida mak atu fó informasaun kredivel ba komunidade hotu-hotu, liu-liu iha Postu Maukatar ba kuida animal no moras ruma hanesan kontamina ba animal seluk no ema.