Xefe Banku Sangue, HNGV, Cladio Julio Quintao hatete, stoke raan daudaun ne’e la sufisiente atu apoiu pasiente sira, tanba ne'e husu ema hotu atu apoiu raan.

“Ita-nia stoke ran daudaun ne'e menus liu atu apoiu ba pasiente sira ne'ebé mak presiza ran, tanba ne'e ha’u husu ema hotu atu apoiu ran turuk ida hodi salva ema ne'ebé mak presiza ran," dehan nia iha HNGV, Sesta (22/12).

Nia dehan, iha fulan novembru, iha instituisaun balun apoiu maibé to'o agora la sufisiente inklui estudante husi Institutu Nasionál Saúde mos apoiu maibé iha ema nain ida deit, tanba sira iha hela atividade ezame nune'e estudante sira la disponivel atu apoiu ran.

“Estoke ran agora daudaun la garante ba loron boot tanba estoke limitadu los, entaun iha nee ita sei iha tipu ran A sei naton hamutuk 19, tipu ran B iha neen deit signifika la sufisiente, entaun presiza familia sira mak tenke ajuda mai suporta iha ne'e inklui tipu ran O mos hamutuk sia entaun estoke la sufisiente atu apoiu ba pasiente sira," tenik nia.

Nia esplika, ho estoke ran ne'ebé mak menus, Banku Sangue hala'o esforsu hela hodi halo aprosimasaun ba Embaixada, Universidade, Palásiu Prezidensiál no F-FDIL.

“Ami halo ona karta ba embaixada sira, instituisaun universidade no mos halo konfirmasaun ho Falintil Forsa Defeza Timor Leste (F-FDTL) atu sira suporta hela ran, atu nune'e ami apoiu ba pasiente sira ne'ebé mak moras presiza ran," tenik nia.