Primeiru-Ministru hato’o sentidu agradesimentu ne’e durante enkontru ho ninia omólogu Primeiru-Ministru (PM) Malázia, Anwar Ibrahim iha Sentru Konvensaun Nasionál (NCC, sigla inglés), Vientiane, Repúblika Demokrátika Populár (RDP) Laos, iha kuarta semana ne'e.
“Agradese bá apoiu hotu-hotu ne’ebé Malázia oferese, partikularmente millaun $3 bá formasaun diplomata timor-oan sira no ita kontinua servisu hamutuk,” dehan Xanana Gusmão liu husi Komunikadu ne’ebé Online INDEPENDENTE asesu, Kinta (10/10).
Tuir komunikadu ne’e haktuir, Malázia anunsia estabelesimentu filiál dedikadu ida husi Institutu Diplomasia no Relasaun Estranjeiru (IDFR), hodi fó formasaun bá diplomata timor-oan sira, enkoraza mós Timor-Leste atu haruka reprezentante sira ba objetivu ida-ne'e.
Iha okaziaun ne’e, Malázia re-afirma kompromissu hodi asselera Timor-Leste nia adezaun ba ASEAN, ho objetivu ba progresu durante Prezidénsia Malázia nian iha tinan oin.
Xefe Governu Malázia fó konsellu ba Timor-Leste atu hasa’e foku ba pilár ekonómiku atu fornese mós atualizasaun regulár kona-bá progresu.
Entretantu, Líder na’in rua ne'e mós diskute kona-ba vizita ofisiál Timor-Leste nian ba Malázia iha tinan ne’e nia rohan, iha ne'ebé sei aborda liu-tan tópiku sira ne'e ho assuntu bilaterál sira seluk.
