Primeiru-Ministru hato’o apresiasaun ne’e liu husi deklarasaun jerál iha Okaziaun Enkontru ho Líder sira ASEAN nian, ho Reprezentante Assembleia Inter-Parlamentár ASEAN (AIPA), iha Viensiana, Repúblika Demokrátika Populár (RDP) Laos, iha loron sia fulan-Outubru tinan ne’e.
“Ami elojia no louva Assembleia ne’ebé servisu hodi fó apoiu no armoniza inklui haforsa kuadru sira lezislativu atu aliña ho norma sira no prátika ASEAN nian,” dehan PM Xanana liu husi Komunikadu ne’ebé Online INDENPENDENTE asesu, Kinta (10/10).
Tuir komunikadu ne’e, Primeiru Ministru Xanana mós deklara, Timor-Leste sai ona observadór iha Assembleia Inter-Parlamentár ASEAN nian desde tinan 2018 iha Singapura.
Alende ne’e, nia dehan, Timor-Leste sai ona testemuña ba Assembleia hodi enkoraza diálogu, servisu hamutuk ho kompriensaun entre Parlamentu husi nasaun membru ASEAN.
“Ita haree ona oinsá rekomendasaun husi Assembleia ne’ebé ajuda Parlementu Nasionál hodi tradús prioridade sira rejionál nian iha Lei sira no polítika nasionál. Parlamentu Nasionál Timor-Leste apoia akordu rejionál,” katak PM.
Primeiru-Ministru aprezenta katak, TL estabelese ona Komité ad-hoc ne’ebé enkarregadu hodi ratifika akordu Protokolu ASEAN nian, promulga lezislasaun relevante sira, monitoriza implementasaun akordu sira ne’e no reprezenta interese povu timorense iha forum rejionál sira.
Ho partisipasaun ativamente iha atividade sira AIPA nian, Timor-Leste hetan koñesimentu no aprende prátika di’ak sira ne’ebé haforsa liu-tán prossesu sira lezislativu no estrutura governasaun nian.
Iha biban ne’e, PM Xanana Gusmão hakarak re-afirma fila-fali kompromissu Timor-Leste nian atu kompleta prossesu sira interna bá akordu prioritáriu sira iha pilár tolu komunidade ASEAN nian iha tinan oin.
Xanana Gusmão espera kolaborasaun kontínua ho membru sira Parlamentu ASEAN nian no parseiru dezenvolvimentu sira iha medida esforsu servisu hamutuk bá adezaun TL atu sai membru plenu ASEAN.
