Prezidente Konsellu Imprensa, Otélio Ote liu husi nia diskursu hatete, fotografia nu’udar meius informasaun ida, tanba liu husi foto ema bele ko’alia lia-fuan rihun ida.

 “Ha’u senti kontente tanba dahuluk Konsellu Impresa selebra iha nia resintu rasik, tinan-tinan ita selebra loron liberdade imprensa iha Balibo iha aldeia naran Laek husi jornalista sira ne’ebé oras ne’e la hamutuk ona ho ita, ohin ita hahú ita nia semana ambiente loron liberdade imprensa ho feira ida, produtu jornalistiku, ita hatene fotografira nudar meius informasaun ida ne’ebé ko’alia lia-fuan rihun ida resin iha foto ida, ita hotu bele interpreta fotografia ida nia signifikasaun,”dehan nia iha Edifisiu Konsellu Imprensa, tersa (09/10/24). 

Prezidente hatutan, fotografia sira ne’ebé Konsellu Imprensa realiza iha espozisaun ne’e, produs ona iha meius komunikasaun sosial sira, imprime no ajensia internasional sira.

Prezidente esplika, iha loron 14 fulan ne’e iha balibo, konsellu imprensa sei realiza feira produto lokal hamutuk ho komunidade Balibo sira, iha loron 16 sei iha mós  atividade forum editorial ne’ebé sei partisipa husi xefe redasaun, editor, diretór no mós jestor sira hodi koalia kona-bá saida mak liu ona iha tinan 22 nia laran no saida mak sei halo iha tinan hirak tuir mai.

Iha fatin hanesan, Vise Primeiru Ministru, Ministru Koordenadór Asuntu Sosiais no Ministru Dezenvolvimentu Rural No Habitasaun Komunitaria, Mariano Asanami Sabino hateten liberdade imprensa ne’e importante tebes ba ema hotu, nu’udar parte integradu ida husi prosesu kontrusaun estadu ka konstrusaun nasaun.

“Liberdade Imprensa ne’e importante ba ita hotu, tanba ne’e parte integradu husi konstrusaun estadu no konstrusaun nasaun, ema lubuk ida ne’ebé fó nia isin lolon iha prosesu libertasaun nasional ne’ebé mak ita hotu hatene atu hasai informasaun ne’e difisil tebes iha momentu ne’ebá,” dehan Vise primeiru Ministru.  

Entretantu, Eis Prezidente Repúblika no Eis Primeiru Ministru, Taur Matan Ruak liu husi nia diskursu hatete, papél jornalista nian importante tebes, tanba ne’e, nia parte enkoraja jornalsita sira atu kontinua brani atu fó sai informasaun ne’ebé los no kredivel.

 “Ha’u hakarak hatete, papel jornalista ne’e importante tebes, ita boot sira la iha nasaun, dalaruma imi sempre kiik iha ema boot sira nia leet, maibé imi nia ne’e kro’at liu no maka’as liu. Klaru ké situasaun ambiente uluk no agora la hanesan, agora nia dezafiu boot tebes, tanba imi bele foti ema no imi mós bele oho ema, oho ema nia kredibilidade, pestizu no karaktér se imi la kuidadu hasai informasaun ne’ebé lolos, liberdade espresaun ne’e importante los, maibé iha mós direitu balun ne’ebé proteje husi lei, tan ne’e ha’u inkoraja par imi kontinua brania maibé antes imi nia notisia ka informasaun sira sai favor ida, estuda didiak revee halo didiak, ida ne’e tebes, los no la bosok,” dehan Eis PM.

Enkuantu, iha espozisaun ne’e partisipa husi, Eis Prezidente Repúblika Taur Matan Ruak, Vise-Primeiru Minsitru Mariano Assanami Sabino, Sekretariu Estadu Komunikasaun Sosial Expedito Dias Ximenes, Embaixadór sira, estudante no mós entidade sira seluk tan.