Diretóra Plan Internasional Tmor-Leste, Dillyana Ximenes hatete, programa ne’ebé Plan Internasional realiza ne’e, hola parte ba iha selebrasaun loron internasional labarik feto ne’ebé sei realiza iha loron 11 fulan-Outubro tinan ne’e.
Nia dehan, diskusaun ne’e, partisipa entre labarik feto sira ne’ebé mai husi grupu 13 no iha diskusaun ne’e foku ba programa importante haat hanesan impaktu husi mudansa klimatika, krime ka violensia, kaben sedu no mós buka solusaun ba páz.
“Objetivu husi atividade ida ne’e, hola parte ida husi ami nia selebrasaun ba loron mundial labarik feto ne’ebé sei akontese iha loron 11 fula ida ne’e, entaun ami foku iha asuntu boot haat, asuntu dahuluk koalia konaba impaktu husi mudansa klimatika ba labarik feto no foinsa’e sira no universidade, daruak ami foku ba krime no violensia n’ebé akontese no datoluk foku ba isin rua resu ho forsada kaben sedu no ikus liu kona-bá oinsa buka solusaun atu harii paz,” dehan nia iha edifisiu Galeria Memori Farol, Tersa (08/10).
Iha fatin hanesan, Embaixadora Plan Internasional iha Timor-Leste, Cidalia Nobre Mouzinho Guterres, hateten, nia parte sente orgullu hodi kontinua halo kampaña públiku ba dala tolu, ne’ebé ho tema “hamutuk ba dame” hodi fó atensaun konkreta no responde ba impaktu negativu husi krize ba labarik feto no jovem feto sira, iha ambitu komemorasaun loron mundial labarik.
Embaixadora ne’e akresenta, diskusaun entre labarik feto sira ne’e, atu fó atensaun imediata ba mundu inklui Timor-Leste atu implementa ho sériu konaba harii no haburas páz ba labarik feto no jovem feto sira.
“Atividade diskusaun entre labarik feto no jovem feto, ko’alia konaba kestaun impaktu husi issu klimatika nomos prevensaun konflitu hodi bolu atensaun ba mundu inklui ita hotu ne’ebé iha Timor-Leste hodi implementa asaun ho seriu, ba asaun konkreta konaba harii no haburas páz no asaun koletiva ho ursensia hodi respode ba risku klimatika,”katak Cidalia.
Entertantu, partisipa iha diskusaun ne’e, grupo joven feto hamutuk 13 ne’ebé iha kapital Dili, no partisipa mós husi entidade sira husi Ministeriu Edukasaun, Ministeriu Defeza, Ministériu Saúde, Sekretaria Estadu ba Igualidade no seluk tan.
