Rezolusaun ne’e aprezenta husi, Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál Abitasaun no Komunitária, Mariano Assanami Sabino no husi Diretór Ezekutivu Unidade Misaun hodi Kombate 'Stunting' (Raes-badak), Joel Maria Pereira.
Tuir Komunikandu ne’ebé, Online INDEPENDENTE asesu, Planu Anuál Multisetoriál Kombate Raes-badak ba períodu tinan 2024 to’o tinan 2030 ho objetivu prinsipál atu fornese kuadru asaun koordenada no multisetoriál ida hodi kombate Raes-badak iha Timor-Leste.
“Entre meta prinsipál sira ne’ebé ko’alia mós atu hasa’e taxa susu-been eskluziva inan nian, hadia dieta ba labarik sira no hamenus taxa Raes-badak husi 47% tun-ba 25% to’o tinan 2030,” dehan Komunikadu ne’ebé Online INDEPENDENTE sita, kinta (10/10).
Tuir komunikadu ne’e haktuir, objetivu husi planu ne’e mós atu hamenus taxa aneimia ba labarik no inan ho idade reprodutiva sira, nune’e mós hadi’a koordenasaun ba programa nutrisaun no promove mudansa komportamentu sosiál hodi hadi’a saúde nutrisionál.
Entretantu, implementasaun ba planu ne’e sei lidera husi Unidade Misaun Kombate 'Stunting' servisu hamutuk ho ministériu no parseiru dezenvolvimentu oioin no prosesu ne’e sei hetan monitorizasaun kontínua hodi garante ninia efikásia ho objetivu atu kria ambiente ida ne’ebé sustentavel no reziliente hodi hasa’e nutrisaun no populasaun timoroan nia moris di’ak.
