Projetu dekretu lei ne’e aprezenta husi Vise-Primeiru-Ministru, Ministru Koordenadór Asuntus Sosiál no Ministru Dezenvolvimentu Rurál no Abitasaun Komunitária, Mariano Assanami Sabino.

Tuir Komunikandu ne’ebé Online INDEPENDENTE asesu katak, Programa ne’e ho objetivu atu asegura direitu ba abitasaun, nu’udár kondisaun ida ba dezenvolvimentu integradu no sustentavel komunidade nian, liu husi planeamentu no kontrusaun hela-fatin no infraestrutura no ekipamentu koletivu komplementár sira ne’ebé destina atu atribui ba benefisiáriu, tuir kritériu sira ne’ebé hatuur ona no mós ápoiu kontinuasaun ba komunidade tuir mai ba manutensaun no asesu ba servisu sira.  

“Implementasaun programa ne’e sei lidera husi Ministériu Dezenvolvimentu Rurál no Abitasaun Komunitária hamutuk ho adminitrasaun lokál sira no hetan partisipasaun ativa husi komunidade sira,”dehan Komunikadu ne’ebé Online INDEPENDENTE sita, kinta (10/10). 

Komunkandu ne’e haktuir, abitasaun sira ne’e, sei entrega ba benefisiáriu tuir kbiit finanseira ne’ebé aliña ona iha rejime sira hanesan, komersiál, subsidiadu, komunitáriu ka sosiál.  

Tan ne’e, iha rejime komersiál ne’e, benefisiáriu sei selu kontraprestasaun ne’ebé define ona husi kondisaun merkadu no rejime subsidiadu, valór atu selu sei ajusta asesivel tuir kondisaun merkadu nian. 

Enkuantu, rejime komunitáriu, sei entrega uma ho gratuita iha faze inisiál, ho montante ida ne'ebé tenke selu hafoin períodu ne'e estabelese. Aleinde iha rejime sosiál, abitasaun ne’e sei entrega sein kualker kustu.