"Iha tempu badak ha’u sei haruka naran membru Governu ba Sua Exelensia PR para fó pose, tanba Governu besik tinan tolu lao ho roda tolu de’it, ha’u hakarak kompleta tan roda ida,"dehan PM Taur ba jornalista sira hafoin remata enkontru semanal ho PR, Iha Palasiu Prezidensial, Aítarak laran Bairu Pite, Díli, (30/04).

Nia dehan, lista naran ne’ebé atu haruka ba PR ne’e laos halo remodelasaun, maibé atu kompleta deit kadeira balun ne’ebé sei mamuk.

Kandidatu membru Governu foun mak hanesan, husi Partido Demokratiku na’in ida mak Meta Malik ba Ministru assuntu Kombatantes Libertasaun. Husi partido FRETILIN, mak Manuel Vong ba Ministru Turismu no Komersiu Indústria, ho nia Vise Inácia Teseira, Faustino Cardoso ba Ministru Estatal,  no Fernando Hanjam ba Ministru finansas.

Entretantu, Dra. Odete Maria de Freitas Belo ba Ministra Saúde.

"Ha’u bele fó naran ba ita boot (Jornalista) sira ministru ba asuntu kombatantes libertasaun Meta Mali husi PD, Ministra Saúde Dra. Odete, Ministru Turismu no Komersiu Indústria Manuel Vong no Vise Ministru Turismu Komersiu Industria Inácia Teseira, Ministru Estatal Faustino Cardoso, Ministru Finansas Fernando Hanjam naran sira ne’e mak ha’u sei haruka mai PR Lú-Olo atu fó pose,"dehan PM Taur.

Tuir informasaun katak, partido CNRT orienta ona nia meembru Governu sira iha Governu atu rezigna an.

Eis Jeneral Taur afirma, politika ne'ebé koligasaun AMP defende mak hakarak Governu Inkluzaun.

"Ami ho politika mak defende governu inkluzaun, tanba ne’e ha’u kontente hamutuk ho sira durante tinan ida resin, tanba ne’e ha’u matein kontinua servisu ho sira, maibé restu depende ba sira,"afirma nia.

Maibé, nia dehan, bainhira partidu CNRT hakarak husu atu rejigna an sei laiha dalan seluk prontu aseita desizaun.

"CNRT mak husu rejigna an ha’u apoiu, maibé lá obriga sira no ha’u sei lá hasai CNRT sira husi membru VIII Governu,"tenik Taur.