Hafoin hasoru-malu ho PR Lu Olo, PM Taur hatete, kona-ba sosa asaun ConocoPhillips, iha ona akordu ida maibé prosesu balun sei la’o no bainhira hotu ona governu sei informa ba públiku.

“Kona-ba sosa asaun ConocoPhillips ne’e iha ona akordu ida, maibé... prosesu balun sei la’o, bainhira to’o final ona sei informa ba públiku, maibé prinsipiu ita iha,” dehan PM Taur hafoin enkontru semanál ho PR Lu Olo hodi informa atividade governu nian no preparativu governu ba OJE 2019.

Maske nune’e, PM Taur hatutan, governu seidauk iha informasaun detallu tanba ne’e governu sei hein ekipa negosiasaun atu bele hatene informasaun detallu liu tan.

Kona-ba atu dada kadoras mai Timor Leste, Taur dehan, Timor Leste nia hakarak mak atu dada kadoras mai, maibé molok to’o iha ne’ebá presiza halo servisu lubuk ida.

“Ita-nia ekipa negosial sei halo negosiasaun tuir mai tanba la’os de’it negosiasaun ida ne’e mak ita sei rezolve problema hotu, maibé sei iha servisu barak. Ita-boot sira sei iha informasaun, ita hotu sei iha informasaun detallu liu kona-ba posibilidade (dada kadoras mai TL) maibé iha, atu fó ba ita la’o maka’as, la’o di’ak liu tan ba oin atu atinje objetivu ida. Ne’ebé lori Greater Sunrise ka Pipe Line mai Timór ne’e akontese ka la’e ne’e ita sei hatene di’ak liu tan iha futuru,” katak Taur. 

PM Taur hatete mós katak, PR Lu Olo hakarak atu hetan informasaun di’ak liu tan, no PM Taur hatete ba PR Lu Olo katak bainhira ekipa negosial fila ho informasaun detallu, sira sei informa nafatin ba PR atu kontinua akompaña prosesu ne’e tomak.

“Tanba karik iha nesesidade aumenta orsamentu atu selu, naturalmente sei mai iha Prezidente Repúblika, entaun Prezidente Repúblika presiza hein informasaun detallu atu bele ajuda Prezidente Repúblika halo desizaun ne’e,” katak nia.