Objetivu husi vizita ne'e, atu fó orientasaun no ordem direta ba tékniku sira husi Diresaun Jeral Terras no Propriedades no mós Servisu Kadastru ba levantamentu ba dadus iha terenu, hirak ne'ebé tuir planu sei simu uluk “Sertifikadu Titulu Na’in ba Rai” ba sidadaun sira iha Selebrasaun Loron Proklamasaun Independensia 28 Novembru mai.
Xefe Governu afirma, sertifikadu títulu nain ba rai iha valor boot tanba investór ida atu mai investe iha timor aspetu ida mak ambiente negósiu ne’ebé bele suporta nune’e nia bele mai investe, no ida ne’e liga mós ba sertifikadu títulu nain ba rai.
“rai ninia situasaun regularizadu ne’e atrai investidores, tanba aspetu ida importante mak ambiente negósiu. Ambiente negósiu ne’e ida mak ne’e titular rai laiha; “ha’u mai kuda ha’u-nia osan iha ne’e, aban bulak ida mai dehan rai ne’e ha’u-nian, ne’e ema rugi. Ezemplu mak rai Ensul hafoin investe tiha 40 milloins dólares, iha ema balun mai reklama dehan rai ne’e sira nian”. dehan Xefe Governu, iha komukadu ne’ebé Online INDEPENDENTE asesu, sabado ne’e (10/09).
Xefe Governu mós dehan, funsionáriu no kargu xefia Ministériu Justisa nian mak ema ne’ebé lori justisa ba ema, entaun ne’e hatudu ema hotu nia liberdade, no destinu iha Ministériu Justisa nia liman.
“Entaun ida-ne’e maka misaun ne’ebé ita-boot sira tenke halo, tanba ne’e tenke hare ho ema no Estadu nia vida. Ema-nia vida tanba rai ne’e fó valór ba ema, katak iha rai ita bele peñór hodi foti osan, bele dezenvolve ekonomia família, no halo nia uma seguru.
Enkuantu ba Estadu fó rendimentu rai ninia situasaun regularizadu ne’e bele atrai investidór tanba aspetu ida importante mak ambiente negósiu,” tenik.
Entretantu, Primeiru Ministru mós apresia ho servisu Ministru Justisa, Tiago Amaral Sarmento ho dirijente sira tanba fulan-tolu de’it iha tinan 2022 laran, bele hatama reseita millaun $4 ba kofre Estadu.
“Ha’u kontente tanba Ministru Justisa informa ba ha’u katak iha fulan-tolu, kobra millaun $4, ha’u dala ruma tuur hanoin katak, sé imi fulan-tolu de’it kobra ona hanesan ne’e, sira seluk iha tinan barak la kobra signifika katak balun ne’e ba fali fatin seluk. Entaun ha’u fó parabéns. Imi kumpre de’it lei lalika ta’uk presaun husi sé de’it, maibé tenke ho atensaun sé lae imi mak impoin lei imi mak ba para uluk fali iha kadeia,” esplika Primeiru Ministru.
