Ministru MOP, Abel Pires, hatete, parte rua sei esforsu hodi halo dezeñu, nune’e bele halo manutensaun ba dalan hirak ne’e.

“Estrada iha Dili laran, esforsu iha parte rua, agora dadaun dezeñu atu besik hotu ona, atu tau aspal, pur-exemplu Perunas, Komoro no seluk tan ne’ebé la’o hela,”dehan nia iha knar fatin, MOP Kaikoli, Dili, sesta ne’e (09/09).

Nia hatutan, bainhira dezeñu hotu bele implementa ona, maibé sei kleur uituan tanba kapasidade husi kompañia menus tebes.

Tanba ne’e, semana-semana MOP ezije ba kompañia sira atu bele halo kompleta.

Nia dehan, estatutu IGE nian muda ona, nune’e IGE iha kompetensia atu halo intervensaun ba hadia estrada ne’ebé aat.

Governante ne’e dehan, antes iha reuniaun Konsellu Ministru aprova ona alterasaun hodi bele hadia estrada ne'ebe mak a'at.

“Ita agradese ba Primeiru Ministru ho ninia lideransa hodi aprova ona. Ita hein na'in Prezidente Republika promulga, entaun MOP sei servisu hamutuk ho IGE para halo intervesaun lalais ba estrada a'at kiikoan sira ne’e,”tenik nia.

Nia akresenta, kustu ba manutensaun estrada sira iha Kapital Dili, ladun barak, ho de’it montante osan dolar amerikanu rihun $3.