Maibé, Ministru ne’e dehan, iha uma rua mak seidauk halo negosiasuan ho MOP, tanba ne'e hein katak, sei iha aseitasaun maximu husi komunidade sira.

"Ita bo'ot sira (jornalista) hetene, resensiamentu ne'e prosesu ida ne'ebé mak difisil, komplexu, tanba ita muda populasaun sira husi fatin ne'ebe sira hela kleur ona, maske ne'ebá rai estadu, Entaun prosesu ne'e tenke halo ho dignu, halo didiak no koalia diak ho sira, bainhira sira iha aseitasaun no partisipasaun mak ita avansa. Maibe serteza katak, tinan oin 2023 komesa halo ona lansamentu husi Governu hodi loke estrada husi Hera ba tasi-ibun, depois mak iha tenderizasaun hafoin halo kontrusaun,”dehan nia ba Online INDEPENDENTE, iha knar fatin, MOP-Kaikoli, Dili, sesta ne’e (09/09).

Nia hatutan, tinan oin mak komesa loke tenderizasaun ba kompañia sira, tanba projetu harii bairu foun ne’e, projetu ne’ebé bo’ot no hetan apoiu husi Banku Mundial, la’os Governu de’it, nune’e nia prosesu sei kleur uituan.

Enkuantu, Governante ne’e dehan, parte Ministeriu Obras Publika seidauk hatetne lolos populasaun afetadu hira mak sei sai, no hira mak sei tama ba iha projeitu, tanba dadauk ne’e sei halo negosiasaun ho komunidade sira.

Nune’e, orsamentu ne’ebé atu prevé ba iha konstrusaun ne’e, sei depende ba iha negosiasaun sira.

Entretantu, molok ne’e, refujiadu hamutuk uma-kain 104 nuudar vitima ba inudasaun 04 Abril 2021, iha Bairu Kampun Baru, Aldeia Ailok-Laran, Suku Hera, Postu Administrativu Hera, Munisipiu Dili, husu ba Governu atu kria bairru foun no fatin dignu ba sira.

Enkuantu, iha sorin seluk, vitima inundasaun sira ne’ebé dadauk sei hela iha kost hamutuk uma-kain 45, kompostu husi na’in 11 iha Manleuana no 34 iha Hera.