Haktuir komunikadu, Xefe Governu hato’o mensajen ne’e durante partisipa sermónia resesaun diplomátika ba saniversáriu dala 11 eleisaun Sua Santidade Papa Fransisco nian ne’ebé organiza husi Reprezentante Santa Sé mai Timor-Leste, Mgr. Marco Sprizzi no Igreja Katolika iha edifisiu Santa Sé.
“Parabens Sua santidade Papa Francisco, lori povu Timor-Leste deseja ita ho saúde nafatin, espera bele vizita," dehan komunikadu ne'ebé INDEPENDENTE asesu, horisehik.
Tuir komunikadu, PM Xanana hato'o parabens hodi entrega prezente fotografia furak ba Reprezentante Santa Sé Mai Timor-Leste, Mgr. Marco Sprizzi akompaña hosi Prezidente Repúblika.
Prezidente Repúblika, José Ramos-Horta hodi Estadu no Povu Timor-Leste nia naran mós hato’o parabéns ba Santidade Papa Fransisco atu hetan nafatin grasa no isin di’ak no bele susesu hala’o nia vizita mai Timor-Leste tuir agenda ne’ebé planea ona.
Premiadu Nobel ba Dame, Ramos-Horta konsidera relasaun Igreja Katolika no Vatikanu metin ba bebeik ho kooperasaun servisu ne’ebé estabelese husi kedas Kreda Katolika to'o Timor-Leste hetan independensia tinan 2002 to'o ohin loron.
Iha oportunidade hanesan, Reprezentante Santa Sé mai Timor-Leste, Marco Sprizzi husu ba sarani Timor-Leste kontinua hasa’e nafatin orasaun hodi Papa bele vizita mai Timor-Leste ho susesu.
Sarani Timor-Leste tenki orgullu, tanba Papa Fransisco aprova ona ajenda vizita mai Timor-Leste nu’udar momentu istóriku, tanba Papa Fransisco aseita atu vizita mai Timor-Leste hodi hela durante loron tolu (3) tuir agenda no programa ne’ebé Komisaun Organizadora Vaticano (KOV), Igreja Katolika no Estadu Timor-Leste prepara dadaun ne’e.
Serimónia ne’e marka prezensa husi Eis Primeiru-Ministru Jenerál Taur Matan Ruak, Eis Primeiru-Ministru, Rui Maria de Araújo, Eis Prezidente Parlamentu Nasionál, Aniceto Guterres, korpu diplomatikus, padre, madre, membru governu, deputadu, veteranus, komandante F-FDTL, PNTL no entidade setór privadu nasionál no internasionál.
