Iha enkontru entre Primeiru Ministru no Harinder Singh Sidhu ne'e akompaña husi Ministra Saúde (MS), Élia dos Resi Amaral no reprezentante Organizasaun Mundial Saúde (OMS), iha Timor-Leste, Arvin Mathur.
Ministra Saúde, Élia dos Resi Amaral hateten, enkontru ne’e hodi introdus kooperasaun servisu ne’ebé Ministériu Saúde no Ospitál Apollo India hala’o hodi hato'o ba xefe governu.
“Ami kri koperasaun atu dezenvolve parte rekursus úmanu no mós asistensia medikamentu ne'ebé ita presiza tau atensaun seriu iha Timor-Leste," dehan Élia, iha Palásiu Governu, Kinta (14/3).
Nia afirma, Ospital Apollo India hakarak apoia no reforsa kooperasaun servisu saúde Timor-Leste iha área dezenvolvimentu rekursu umanu profisionais saùde no medikamentu nian, entaun ida ne'e importante tebes.
Ministra Élia afirma, apoia ne’e sei tulun di’ak liu tán politika Ministériu Saúde ne’ebé define ninia programa atu kuidadu saúde ba ema hotu no profisionaliza servisu rekursu umanu mediku Timor-oan sira hodi fó asistensia saúde di’ak no servisu ho profisional hodi fó atendimentu ba sidadaun tomak.
Entretantu iha enkontru ne'e PM Kay Rala Xanana Gusmao hato’o agradese no husu ba Ministériu Saùde no ekipa Ospital Apollo India no OMS atu kontinua koopera no dezenvolve kooperasaun ne’e ba oin.
