Tuir Diretór Nasionál Infrastrutura no Edukativu-Ministériu Edukasaun, Hélio Lopes hatete, tuir proposta ne'ebé tama iha ME eskola hamutuk 180 mak menus meza ho kadeira, nune'e ME Halo ona verifikasaun no tempu badak sei distribui meza ho kadeira ne'ebé ME kompara ona.
Nia dehan, kadeira no meza dadaun ne'e rai ona iha armajen Ministériu Edukasaun nia, no tempu badak sei distribui ba eskola sira iha teritoriu tomak, hahú husi pre-eskolár to’o nível sekundária iha teritóriu tomak ne'ebé meza kadeira sei falta.
"Ita agora dadaun ita-nia kadeira ho meza ba eskola sira ba ita-nia estudante sira husi pre-eskolar ba to'o nível Sekundáriu, kadeira hirak ne'e iha ona armazen ministériu nian no agora dadauk ministériu halo hela verifikasaun hafoin ministériu sei distribui ba eskola sira ne'ebé mak la iha kadeira ho meza no eskola sira ne'ebé foin halo ninia konstrusaun signifika eskola sira ne'ebé tinan kotuk ita konstrui foun," dehan Diretór iha nia kanar fatin Vila-Verde, Segunda (18/03).
Nia hatutan, antes ne'e ME, distribui ona kadeira no meza hamutuk rihun 20 ba eskola sira iha teritoriu tomak maibé la sufisiente nafatin.
Diretór Nasionál Infrastrutura ne'e hatutan, Ministériu Edukasaun garante katak iha tinan ida ne'e sei rezolve hotu problema sira liuliu liga ho kadeira no meza.
"Tanba ne'e mak Ministériu Edukasaun garante katak, dalaruma eskola labarik sira tuur iha rai, balun la iha kadeira ho meza, ministériu sei rezolve buat hirak ne'e iha tinan ida ne'e, no sei la iha tan kazu sira hanesan nee," nia dehan.
Enkuantu, orsamentu ne'ebé ME prevee hodi sosa kadeira ho meza hirak ne'e ho montante hamutuk $rihun 190 resin hodi sosa kadeira hamutuk rihun ualo resin.
Tanba Ministériu Edukasaun mós sei iha planu atu sosa tan kadeira no meza bainhira iha distribuisaun hatudu katak kadeira ho meza ne'e seidauk responde ba nesesidade eskola sira ne'ebé iha teritóriu tomak.
Nia dehan, sei buka para rezerva tan por volta 10 mil kadeira no meza ba estudante sira hahú husi pre-eskolar to’o nível sekundária. Tanba atu asegura mós ba sala-de-aula foun sira hafoin remata konstrusaun hirak ne'ebé sei la'o hela ne'e nune'e bele responde imediate ba nesesidade estudante sira-nian.
Iha sorin seluk, Koordenadór Eskola Báziku Filiál Becusse-de-baixo, João Sequeira hatete, dadaun ne'e sira mós presiza kadeira no meza, tanba ho totál estudante ne'ebé barak kada turma ho turnu ne'ebé iha.
"Agora ita-nia estudante sira ne'e barak loos. Kada turma nia frekuensia la hanesan, depois ita fahe bá turnu rua, dader no loraik, entaun dalaruma turnu loraik nia ne'e barak liu entaun hiit kadeira husi turma seluk ba iha turma seluk hodi uza tanba kadeira númeru la fiksu, no dalaruma la to’o ne'e nain-2 tur iha kadeira ida, ida ne'e difikuldade ida ne'ebé mak ita iha," nia informa.
Nune'e nia husu ba Ministériu Edukasaun, atu bele fasilita hela kadeira no meza ba iha eskola báziku filiál Becusse-de-Baixo, nune'e bele ajuda estudante sira atu labele hiit kadeira ba mai atu uza iha prosesu aprendizajen.