Raiña Elisabeth hakotu-iis iha loron 08 fulan-Setembru tinan 2022, ho idade 96, iha Castelo Balmoral, Eskósia.
“Primeiru Ministru, Taur Matan Ruak, lori Governu no Povu timoroan nia naran, hato’o ninia sentidu kondolénsia ba família Raiña nian, nune’e mós ba Governu no Povu Reinu Unidu,”dehan komunikadu ne’ebé Online INDEPENDENTE, asesu iha Pajina Ofisial PM nian, tersa ne’e (13/09).
Entretantu, Raiña Elisabeth II, moris iha loron 21 fulan-Abríl tinan 1926, iha Londres, no mate hafoin iha fulan balun liu bá selebra ninia jubileu ukun nian ba 70, iha istória británika ne’ebé naruk no sai hanesan istória ida ne’ebé naruk liu iha nivel mundiál.
Nune’e, Raiña Elisabeth II, nia oan mane boot Carlos, ne’ebé troka nia fatin iha tronu no adota títulu Carlos III.
Iha sorin seluk, Portavós Governu Konstitusionál VIII nian, Ministru Fidelis Magalhães, salienta katak ninia legadu sei moris no grava nafatin iha memória ema hotu nian iha mundu tomak.
Enkuantu, Iha tinan 2003, Raiña Elisabeth II, kondekora eis-Prezidente Repúblika Timor-Leste nian, Kay Rala Xanana Gusmão, ho Grau Cavaleiro Honorário da Grande Cruz da Ordem de São Miguel e de São Jorge.
