Xefe Governu fó xamada atensaun ba ministru turizmu no nia vise tanba asina akordu ho investidór Japaun no Indonézia atu loke jogu lotaria no toto bola iha Timor-Leste.
PM Alkatiri dehan, tenke bolu ministru turizmu ho vise-ministru atu ko'alia nune’e tenki tuir lei. Labele asina iha kotuk-kotuk laiha autorizasaun husi Xefe Governu mak asina to’o ikus mosu konfuzaun boot.
“Biar nune’e, Ha'u sei ko'alia ho ministru ho vise-ministru buat hotu tenke tuir lei, labele halo sasán luflafu de’it”, tenik nia, iha Eis-Komarka Balidi, horisehik.
Tuir Alkatiri, membru Governu na'in rua ne’e halo asina akordu ho empreza sira la tuir lei orgánika VII Governu Konstitusionál baihira fó lisensa ba empreza atu investe negósiu ba jogu.
Iha loron 25 Janeiru 2018, Ministru Turizmu, Manuel Lito Vong ho Vise-Ministru, Rui Menezes, asina ona akordu loke jogu ho investidór husi Japaun no Indonézia.
Atitude membru Governu na’in rua ne’ebé asina akordu laiha koñesimentu ba primeiru ministru.
