Maski nune’e, tuir informasaun ne’ebé Xefe Governu rona, Xanana Gusmão rejeita atu asina nota entendimentu kona-ba prosesu delimitasaun fronteira marítima nian.
Xefe Negosiadór ba Delimitasaun hakarak atu entrega prosesu ne’e ba governu maka asina nota entendimentu ne’e.
Ne’e duni, PM Alkatiri hein prezensa Xanana Gusmão nian iha Timor-Leste hodi bele diskute kle'an liután kona-ba futuru prosesu asinatura dokumentu nota entendimentu nian.
“Ha'u rona irmaun Xanana Gusmão dehan membru Governu ida mak tenke asina. Ne’e duni nia mós konkorda membru Governu ne’ebé nomeadu ba fronteira marítima mak Agio Pereira”, dehan Alkatiri ba Jornalista iha eis Komarka Balidi Dili, segunda (5/2)
Nu’udar Xefe Governu kontinua hein Xefe Negosiadór Prinsipál ba FM atu diskute, nune’e foti desizaun hodi asina akordu ba delimitasaun futuru tasi Timor.
Tanba ne’e, PM Alkatiri kontinua fó onra méritu ba Xanana Gusmão atu asina akordu ne’e.
Xanana Gusmão mak halo negosiasaun ba futuru fronteira marítima iha ona sinál, hakarak ka lakohi Xanana mak asina.
Tenke Tuir Rekizitu
Xanana Gusmão hanesan Xefe Negosiadór Prinsipál ba Delimitasaun Fronteira Marítima, hakarak atu asina tratadu sira tenke tuir kritériu mak hanesan simu pose husi Xefe Estadu.
Governu anteriór nia mandatu remata ona, agora ne’e tama ba VII governu no IV lejizlatura, estruturamente tenke tuir rekizitu.
“Sé mak atu ba reprezenta Estadu hodi asina tratadu fronteira tasi Timor ne’e tenke tama iha governu ida ne’e”, dehan deputadu bankada FRETILIN, Antonino Bianco, iha Uma Fukun PN, horisehik.
Bainhira primeiru ministru, ministru negósiu estranjeiru no ministru asuntu fronteira marítima labele asina, signifika haruka xefe negosiadór mak asina, maibé tenke dentru husi estrutura IV lejizlatura ne’e.
Tuir Antonino, atu asina tratadu ruma tenke tau ketak lider istóriku, tanba iha rai ne’e lider istóriku barak maibé la reprezenta hotu Estadu. Ida ne'ebé reprezenta Estadu maka governu fó fiar ne’e.
Deputadu ne’e mós la nega esforsu tomak ne'ebé Xanana Gusmão halo ona, maibé hakarak atu asina mak nia tenke simu pose husi Prezidente Repúblika nu’udar Prezidente Autoridade.
Iha fatin hanesan, Prezidente Bankada CNRT, Arão Noe de Jesus hatete, Primeiru Ministru, Mari Alkatiri, duvida hela ho Xanana Gusmão nia servisu kona-ba negosiasaun fronteira marítima iha rai li'ur ne’e husik duvida ne’e hela ho nia.
Tanba Estadu no povu hatene hela servisu Xanana Gusmão nia iha rai li'ur ne'ebá. Foin lalais ne’e mak hakotu tan tratadu ne'ebé uluk primeiru governu halo akordu ida katak to’o tinan 50 mak foin bele negoseia fronteira marítima permanente.
Maibé, ho esforsu Xanana nian iha loron 3 Fevereiru 2018 hakotu ona tratadu tinan 50 no habadak tinan ida.
“Se governu sei duvida, husik duvida ne’e hela ho sira. Maibé, ami hatene katak maun boot halo hela servisu”, dehan Arão.
Alende ne’e Arão hatete, relasiona ho Xanana ne'ebé seidauk hetan pose husi prezidente repúblika, tanba ne’e labele asina tratadu. Ne’e buat kiik ona, importante maka rezultadu finál iha ona.
