Deputadu PLP, Sabino Soares ‘Guntur’ hateten, halo rekrutamentu ba asesór la tuir ninia abilidade ka espesialidade no la tuir nia koñesimentu.
“Tanba família, partidu, feen-la’en no maun-alin tama hotu”, dehan nia, iha Uma Fukun PN, horisehik.
Maski nune’e, deputadu ne’e la esplika klaramente kona-ba instituisaun ne’ebé akumula família sira hodi sai asesór.
Tuir loloos, nia dehan, asesór ba instituisaun ida mínimu ne’e na'in neen, jurídiku ida, tékniku rua, área sosiál sira seluk hanesan espesialista kona-ba antropolojia no sosiolojia. La presiza asesór barabarak.
Nia iha razaun tanba saida reklama la tuir abilidade, tanba iha ministériu balun asesór sira hasai kursu espesialidade ezata, maibé bele sai fali asesór asuntu sosiál.
Tanba ne’e, governu presiza halo avaliasaun ba asesór nia papél se lae orsamentu ba bens servisu no transferénsia públiku selu mak tékniku apoiu polítiku sira de'it.
Tuir nia, ema sira ne’ebé apoiu tékniku sira ne’e tenke haree didi'ak sira, tanba ministru halo rekrutamentu tuir sira nia hakarak de'it.
Antes ne’e, Presidente Konsellu Konsultivu Fundu Petrolíferu (KKFP), Pe. Júlio Crispim de Jesus hateten, Governu kontratu ema lubuk ida atu halo servisu nu’udar asesór iha instituisaun estadu sira, maibé ema sira nia deskrisaun servisu la klaru.
Tuir lista ne’ebé iha, Governu kontrata ona ema hamutuk 1.014 nu’udar asesór ho saláriu mínimu entre USD $5.000 to’o USD $21.000.
Númeru asesór ne'ebé aumenta makaas iha instituisaun Estadu sira kontribui mós ba despeza Estadu ninian. Ne’e duni, governu presiza hadi'a lei asesór tanba ema sira ne’e halo servisu ne’ebé la klaru.
Asesór jurídiku no ekonómiku barak tebes iha governu no ministériu sira, maibé sira ladún haree estrutura orsamentu ne'ebé governu haruka hodi hamosu erru.
“Estadu selu sira barabarak ikus mai retira orsamentu. Sira halo erru boot tanba osan ne'ebé tau ba investimentu, sira tau fali ba funsionamentu mákina Estadu”, dehan Prezidente KKFP.
Iha instituisaun hotu-hotu presiza asesór, maibé tenke iha esperiénsia akadémika, no sira ne'ebé mai husi eis ministru ruma, la'ós ba foti fali sira ne'ebé foin termina lisensiatura akadémika sai asesór tanba de’it partisipa iha kampaña polítika.
Pe. Crispim esplika, asesór barak loloos fó hanoin atu estrutura orsamentu loos, maibé realidade la loos. Ema ne'ebé atu ba asesór serve duni servisu asesoria, la'ós tau naran asesór prinsipál, maibé sai fali asistente programa.
“Asesór ne’e ema ne'ebé iha koñesimentu kle'an, fundu no aas”, tenik nia.
Nia fó ezemplu, asesór jurídiku ne’e tenke hanorin ka servisu tinan barak ba asesór. Hanesan ho asesór ekonómiku tenke iha formandu iha formasaun kontabilidade no esperiénsia boot.
Lei asesór presiza hadi'a, liuliu kona-ba sira ninia montante saláriu, se lae ema balun prefere liu sai asesór tanba osan boot liu kompara ho sai membru governu.
Antes ne’e, Partidu CNRT ne’ebé kaer ukun períodu rua tuituir malu iha 2007-2012 no 2012-2017 sente hafodak bainhira haree númeru asesór ne’ebé governu kontrata to’o 1.014.
Maski Partidu CNRT rasik sai aliadu husi governu atuál ne’ebé lidera husi Primeiru Ministru, Taur Matan Ruak, maibé sente dezapontadu bainhira hateke ba lista asesór nasionál no internasionál lubuk ne’ebé governu fó servisu.
“Ami nia pensamentu ne’e lista asesór ne’ebé barak hanesan ne’e di’ak liu troka funsionáriu públiku lalika servisu hotu, asesór sira mesak mak servisu de’it,” dehan Prezidente Komisaun D PN, Virgínia Ana Belo, ne’ebé mós nu’udar Deputada Bankada CNRT.
Nia hatutan, númeru asesór ne’ebé boot, CNRT nu’udar partidu aliadu husi Governu AMP nian, sei ko’alia iha nivel parlamentu ho governu hodi haree ba asuntu sira hanesan ne’e hodi justifika.
Antes ne’e, iha ínísiu tinan 2019, Ministru Reforma Lejizlasaun Asuntu Parlamentár (MRLAP) promete katak, Governu sei halo revizaun ba saláriu mínimu asesór nasionál sira nian tanba balun boot liu saláriu Prezidente Repúblika, Primeiru Ministru no ministru sira nian, maibé tabela saláriu mínimu asesór nasionál sei hahú husi USD $5.000 -$7.000 ne’ebé hanesan no balun boot liu saláriu Xefe Estadu ne’ebé simu USD $ 5.000 kada fulan.
