Plataforma Nasional Besi Preokupa Ho Orsamentu Ne’ebé Governu Aloka ba Setór Bee no Saneamentu Featured

By Ivonia Varela Setembru 05, 2023 666
Koodenadór Plataforma Besi TL, Januário Amaral. Foto:Google. Koodenadór Plataforma Besi TL, Januário Amaral. Foto:Google.

DILI: Organizasaun Plataforma Nasional Besi Timor-Leste, preukupa ho orsamentu ne’ebé kada tinan Governu aloka ba iha setór bee no saneamentu ne’ebé ho pursentu kiik tebes.

Koodenadór Plataforma Besi TL, Januário Amaral hatete, plataforma hanesan sosiedade sivil ne'ebé durante ne'e halo advokasia ba komunidade sira kona ba bee moos no saneamentu.

Nia dehan, tuir plataforma nia deskobrimentu ne'ebé membru sira halo durante ne'e problema boot ne'ebé akontese mak sutentabilidade sistema bee rural, ne'ebé sai hanesan preokupasaun boot.

"Investimentu ba iha setor bee no saneamentu nia pursentu kada tinan kontinua kiik. Orsamentu ne'e aloka ba bee no saneamentu pursentu ida de'it (1%), tan ne'e espera katak iha oportunidade IX Governu bele tau prioridade ba iha setor be no saneamentu, ne'ebé hatete ona katak investimentu ba setor bee la muda tan," dehan Kordenador hafoin hala'o audensia ho SEEAS  iha Salaun EDTL.EP Kaikoli, Segunda (04/09).

Koodenadór afirma, antes ne'e plataforma halo auditoria peskiza iha Munispiu tolu hanesan, Vikeke, Ermera no Aileu nia rezultadu hatudu katak problema ne'ebé populasaun barak hasoru mak rekursu bee.

Tan ne'e, espera katak iha IX Governu bele aloka orsamentu ne'ebé adekuadu ba iha setór bee ba iha munisipiu sira.

“Tanba, tuir peskiza plataforma nian ba iha munisipiu sira, kuaze la iha orsamentu ba kapital dezenvolvimentu, só iha de'it salariu vensimentu no salariu bem servisu, entaun sai preukupasaun boot, oinsa atu halo manutensaun ba bee iha munisipiu sira”,tenik nia.

Iha fatin hanesan, Téknika Obras Públika Sekretáriu Estadu Eletrisidade Água  no Saneamentu João da Piedade, hatete, IX Governu foin hahú, tan ne'e, ba oin sei hadi'a diak liu tan setór bee no saneamentu ba ema hotu.

Tan ne'e, parte Governu hato'o agradese ba Plataforma Besi ne'ebé fó advokasia ba Governu hodi deskobre ona problema bee iha área rural no remotas.

"Ita ko'alia kona ba bee iha área rural to'o iha área remotas sira, ita hare iha fazeadamente oinsá ita bele atinji ita nia metas ne'e ho di'ak," dehan Tékniku SEEAS.

Entretantu, orsamentu retifikativu ne’ebé aloka ba iha Ministeriu Óbras Públika liu husi programa 798 (Água no Saneamentu) ho total hamutuk $17.747.215 ne’ebé kompostu husi salariu vensimentu $132.992, bens servisu $513.723, transferensia públikas $17.020.000 no kapital menor $80.500.

Rate this item
(0 votes)

Independente Digital TV