Enkuantu, Projetu Dekretu-lei ne'e aprezenta husi Ministru Prezidensial Konsellu Ministru, Ágio Pereira no Sekretária Estadu Igualdade Elvina Sousa Carvalho.

"Iha Enkontru ne’e, Ministru Prezidensia Konsellu Ministrus, Agio Pereira no Sekretária Estadu ba Igualdade (SEI), Elvina Sousa Carvalho aprezenta lei Orgánika SEI nian no konsege hetan aprovasaun iha renuiaun Konsellu Ministrus," Online INDEPENDENTE sita iha komunikadu.

Husi lei orgánika SEI nian ne’ebé iha,  hodi fó apoia ba Sekretária Estadu Igualdade iha ezersísiu ba ninia kompeténsia sira, liuliu iha promosaun igualdade jéneru iha leis, polítikas públikas, planu estratéjiku no operasionál, programa governamentál sira no iha Orsamentu Jerál Estadu.

Nune'e mós, iha sensibilizasaun públiku ba kestaun sira konaba igualdade jéneru no inkluzaun, eliminasaun diskriminasaun no violénsia kontra feto no labarik no promosaun ba partisipasaun feto sira iha vida polítika no sosio ekonómika nasionál.

Entretantu, ho aprovasaun Lei Orgánika SEI nian, servisu Sentrais SEI nian sei kompostu husi Diresaun-Jerál ida (1), Gabinete Inspesaun no Auditoria ida (1), ho Diresaun Nasionál hamutuk lima (5) mak hanesan, Diresaun Nasionál Administrasaun no Finansas (DNAF), Diresaun Nasionál Jestaun ba Planu no Estratéjia (DNGPE), Diresaun Nasionál Dezenvolvimentu ba Igualdade Jéneru (DNDIG), Diresaun Nasionál Polítika Igualdade Jéneru (DNPIG) no Diresaun Nasionál Relasaun Públika no Média (DNRPM) no iha Gabinete Sekretária Estadu ne'ebé sei apoia servisu gabinete nian.

Kada Diresaun Nasionál dezempeña papél espesífiku no interligadu iha Sekretaria Estadu ba Igualdade, kontribui ba implementasaun polítika no asaun sira ba promove igualdade jéneru iha Timor-Leste. Koordenasaun servisu entre diresaun hirak-ne’e fundamentál tebes atu garantia abordajen integrada jéneru ida-ne’ebé efíkas hodi alkansa objetivu servisu SEI nian.