Kestaun ne’e hato’o bainhira Pe, Elisio Locateli hasoru malu ho Vise-Primeiru Ministru, Ministru Koordenador Asuntus Sosiais no Ministru Dezenvolvimentu Rural no Habitasaun Komunitariu, Mariano Assanami Sabino, Gabinete Vise Primeiru Ministru, iha Palasiu Governu, kuarta ne’e (06/09).

Padre Gui da Silva, SDB, hatete, ohin hasoru malu ho VPM-MKDAS no MDRHK atu husu apoiu ba governu hodi hadi'a projetu irigasaun ne'ebé Pe. Locateli tau matan ba.

Nia dehan, tanba populasan nia natar ne'ebé lokaliza iha parte Darlata ho Samalari Munisipiu Baukau barak mak mota estraga hotu.

Tan ne'e sira husu apoia karik governu iha posibilidade bele apoiu hodi aliña di'ak fali mota, atu nune'e labele estraga tan populasaun sira nia natar.

“Objetivu husi hasoru malu ida ne'e, atu husu apoiu ba Governu karik iha posibilidade bele apoiu hela  projetu ne'ebé Pe. Locateli tau matan bá, tanba  populasaun nia natar sira iha parte Darlata no Samalari  dalabarak mota estraga hotu,” dehan Pe. Gui iha Palasiu Governu.

Pe. Gui afirma, asuntu ne'ebé hato'o, parte Governu hakarak tebes atu apoiu orsamentu, sira mós fó resposta ne'ebé vantajem tebes, atu apoiu hodi realiza planu ne'ebé iha.

Pe, Gui haktuir, planu sira ne'e iha rua, ida kurtu prazu ne'ebé tempu badak sei hahú no mós longu prazu ni,a sei hahú iha tinan 2024 ne'ebé sei halo hela preparasaun atu nune'e governu bele apoiu mós.

Aleinde, Vise-Ministru mós hatete ona katak iha tinan 2024 sei fó apoiu tratores ba populasaun iha área rurais sira ne'ebé susar tebes atu asesu ba trator boot, nune'e populasaun sira bele uza hodi halo servisu.

 Iha biban ne'e mós, Pe, Gui ho nia ekipa husu governu nia apoiu ba sentru Espiritul ne'ebé dadaun ne'e harii hela iha Railaku Ermera.

“Sentru ne'e harii ona iha tinan 2019 maibé tanba Covid-19 entau paradu tiha, no iha tinan 2022 kontinua fila-fali, ne'ebé dadaun ne'e atinji ona 70%, maibe sei hasoru hela difikuldade, tan ne'e husu apoiu ba governu hodi bele halo kompleta”, tenik Pe, Gui da Silva.