Ministru Komérsiu no Indústria, Filipus Nino Pereira hatete, TL aborda pontu situasaun ekonomia Timor-Leste nian no inklui polítika IX Governu Konstitusionál ba dezenvolvimentu ekonomia nasionál iha seitor komérsiu no indústria. 

"ohin (horseik) ita koalia kona-ba zona industria, zona komérsiu livre, esportasaun no importasaun, inklui tranzasaun ilegál iha fronteira entre nasaun rua"Dehan komunikadu imprensa ne'ebé Jornál INDEPENDENTE asesu Horisehik.

Asuntu ne’ebé konsidera pertinente mak zona komérsiu livre ne’ebé Timor-Leste no Indonesia diskute hela, no oinsá TL bele aproveita merkadu indonésia hodi eskporta TL nia produtu potensiál sira.

“Maibé Ita konsentra ba free trade area ne’ebé durante ne’e sai ona diskusaun entre Governu Timor-Leste no Governu Indonezia, no dezenvolvimentu ekonomia iha área fronteira. Ida-ne’e mak asuntu prinsipál ne’ebé sai diskusaun iha reuniaun ho delegasaun Indonezia nian ohin"dehan nia.

Alende ne’e, diskute mós balansu komérsiu, tanba Timor-Leste atualmente depende maka’as ba produtu importadu. Maibé, Governu Timor-Leste halo hela esforsu oinsá bele halo balansu iha eksportasaun no importasaun.

“Indonezia iha esperiénsia barak kona-ba oinsá sira dudu sira-nia ekonomia liu husi dezenvolvimentu empreza mikro no kiik sira. Ita opta polítika merkadu livre, ne’ebé ita hanoin kona-ba protesaun ita-nia merkadu" dehan nia.

Nia esplika, ida-ne’e importante hodi iha intervensaun seletiva, ne’ebé mak parte MKI tenke haree hodi asegura TL nia ekonomia rai laran.

Nune'e mós kona-ba dezenvolvimentu kooperativa, ne’ebé bele foti esperiénsia husi Provínsia NTT – Indonesia, hodi dudu kresimentu ekonomia povu nian iha TL.

Governadór Andi Widjajanto fahe sira-nia esperiénsia kona-ba dezenvolvimentu ekonomia iha Indonezia, no preokupa ho tranzasaun ilegál ne’ebé akontese iha fronteira Timor-Leste no Indónezia.

Tanba ne’e, sira preokupa oinsá dezenvolve ekonomia iha fronteira entre Timor-Leste no Indonezia.