Diretóra Interina Plan Internasional Timor-Leste, Fatima Estrela Soares hatete, programa hirak ne’ebé aprezenta ba Primeiru Ministru mak hanesan, dezenvolvimentu komunidade, direitu labarik no direitu jovem foinsa'e sira.
Nune’e, husi programa ne’e hetan mós apoia pozitivu husi Primeiru Ministru hodi kontinua servisu hamutuk.
"Ami hasoru Primeiru-Ministru ne'e ba dala-uluk, Plan Internasional tinan barak hala'o servisu iha Timor, ne'e onra boot bá Plan Internasional atu fahe kona-bá saida mak Plan Internasional halo iha Timor, entaun ami fahe programa ne'ebé ami halo kona-bá dezenvolvimentu komunidade, hare ba iha direitu labarik no mós foinsa'e sira," dehan Diretora interina PITL, iha Palásiu Governu, Segunda (03/02/25).
Diretora Interina Plan Internasional Timor-Leste ne’e hatutan, Plan Internasional aprezenta sira nia servisu ba Primeiru Ministru no hetan apoiu pozitivu hodi bele kontinua servisu ho governu.
Diretora Interina ne’e afirma liu tan, hare bá programa sira ne'e, Primeriu Ministru rekomenda ba Plan Internasional atu prepara planu hodi servisu hamutuk ho governu, atu bele hare kona-bá direitu labarik no direitu jovem iha Timor-Leste.
Ho nune'e, Plan Internasional sei halo konsultasaun ho jovem sira, kona-bá problema ne'ebé joven no labarik sira hasoru, hafoin tau iha planu hodi aprezenta ba Konsellu Ministrus.
Entretantu, programa sira ne’e, plan Internasional hala’o ona iha munisipiu Aileu, Ainaro, no Manufahi.
Enkuantu, kona bá rekursu umanu, dadaun ne’e plan internasional iha rekursu ne’ebé limitadu.
