Ministra Solidariedade Sosiál no Inkluzaun, Verónica das Dores, agradese tebes ba servisu tomak ne'ebé maka durante ne'e Governu Austrália fó ona ba Timor-Leste, maske la'ós foin primeira vez, maibé apoia ne'e mai dala barak ona.
Ministra Dehan, programa BdM-JF la kontinua ona maibé governu TL no Austrália nia Relasaun di’ak.
"Tanba ne'e ha'u espera, Governu Austrália sei fó nafatin apoiu IX Konstitusionál liu husi servisu MSSI, iha ninia programa rasik, ita hotu hatene ida ne'e, nune'e Programa BdM-JF la'ós remata tanba Ministra no Vise nia hakarak, ne'e desizaun husi Konsellu Ministru (KM)," dehan Ministra iha Salaun MSSI Kaikoli, Segunda (05/02).
Governante esplika, tanba programa BdM-JF ba futuru populasaun sei aumenta barak no sei gastu orsamentu ne'ebé boot, ne'e mak governu hapara, maibé ministériu sei halo estudu ida ne'ebé kle’an atu nafatin fó apoiu ba populasaun sira.
Iha fatin hanesan, Team Leader PhD, Melinda Mausaco hatete, Husi prosesu sira servisu hamutuk sira aprende ona matenek lubuk ida no sira mós agradese ba oportunidade sira ne'ebé fó hodi servisu hamutuk no aprende hamutuk.
"Matenek sira ne'ebé ami hetan husi prosesu hirak ne'e sei sai bukae ba ami ida-idak nia hakat tuir mai no ami nia esperansa katak kolega sira iha MSSI liu-liu ekipa DNAS, Ekipa DNPDP, Ekipa GEPDI no ekipa finansa bele mós utiliza esperiensia sira n’uudar referiénsia ba tempu oin mai," dehan nia.
Nia afirma, Tanba atu fasilita hanoin ida ne'e sira prepara ona pakote dokumentasaun husi servisu hamutuk atu entrega no hein katak MSSI sei utiliza nu’udar referiénsia ba servisu sira oin mai.
Dokumentasaun entrega ne'e organiza ona ho didi'ak iha pakote kompreensivu tolu, Program BdM-JF, Inkluzaun Difesensia, Evidensia husi Implementasaun no Análiza Setór.
Iha biban nee, Diretór no Coofundador Catalpa Andrea Hofstee hateten, prinsípiu xave parseira entre PhD no MSSI maka, servisu tuir polítika no planu MSSI nian, apoiu MSSI hodi implementa nia polítika no planu rasik, servisu hamutuk hodi hametin sistema MSSI nian, atu bele presta servisu inkluzivu ho kualidade di'ak iha área Protesaun Sosiál no Inkluzaun Defisiénsia.
"Ohin ita hotu hamutuk iha ne'e, atu partisipa no sai sasin ba serimónia termu entrega servisu sira ne'ebé durante ne'e PhD fornese ba MSSI ho apoiu orsamentu husi Governu Austrália. Ita hotu hatene, PHD hahú servisu hamutuk ho MSSI tinan 7 liu bá. Hahú ho paisajen luan iha área Protesaun Sosiál no Inkluzaun defisiénsia. Ami haksolok tebes, tanba husi ita-nia servisu hamutuk konsege hamosu buat barak," nia agradese.