FRETILIN Suspeita MS Elia Amaral iha Indisius Forte ba Prátika Krime Abuzu Podér Featured

By Ekipa INDEPENDENTE Fevereiru 06, 2024 2010
Deputadu sira husi bankada FRETILIN, iha Parlamentu Nasional. Foto:Media PN. Deputadu sira husi bankada FRETILIN, iha Parlamentu Nasional. Foto:Media PN.

DILI:Bankada Frente Revolusionáriu Timor-Leste Independente (FRETILIN) iha Parlamentu Nasionál, suspeita boot ba Ministra Saúde (MS), Elia dos Reis Amaral tanba iha indisiu forte ba prátika krime abuzu podér, favoritismu no poténsia ba partisipasaun ekonómika.

Tuir komunikadu ne’ebé Online INDEPENDENTE asesu iha tersa (06/02) katak, Ministra Elia halo prosesu adjudikasaun direta ka hili kompaña Sali-Mago Unipessoal Lda hodi hatama aimoruk, mesmu Sali-Magu iha de’it esperiénsia iha area konstrusaun maibé la iha esperiénsia sosa ai-moruk.
“Haree ba faktu hirak ne’e, Bankada FRETILIN iha suspeita bo’ot tanba haree hanesan iha indisiu forte katak Sra. Elia dos Reis Amaral Ministra Saúde prátika krime abuso de poder, favoritismo no potensia ba partisipasaun ekonomika iha prosesu adjudikasaun direta ka hili kompaña Sali-Magu Unipessoal Lda. Tanba ne’e, Bankada FRETILIN, ho baze ba artigu 211 kodigu prosesu penal, hato’o partisipasaun ka keixa ba Ministeriu Públiku atu bele loke investigasaun kle’an ba prosesu ajudikasaun direta ba kompañia Sali-Magu Unipessoal Lda, no nia prosesu akizisaun ka sosa ai-moruk no produtus farmaseutikus ne’e rasik” sita komunikadu.
Iha loron 06 fulan Fevereiru tinan 2024 bankada FRETILIN hatama partispasaun ba Prokuradoria Geral Repúblika kona-ba Prosesu adjudikasaun direita ba akizisaun ai-moruk.
Polémika kona-ba falta ai-moruk, materiál konsumável sira no produtu farmaseútika iha fasilidade saúde hahú husi Postu Saúde, Sentru Saúde to’o mai hospital sira, kontinua sai preokupasaun públiku nian. Governu, liu husi Ministra Saúde, tenta desvia hodi soe kulpa ba Governu anteriór no tenta atu subar realidade loloos.
Bankada FRETILIN, buka atu komprende kauza husi problema falta ai-moruk ne’e, no liu hosi fiskalizasaun no ezaminasaun dokumentu sira relasiona ho prosesu sosa ai-moruk ne’e rasik, deteta faktus balu ne’e be’e levanta supeita katak problema ne’e mai husi prosesu hili kompaña ne’ebé atu sosa ai-moruk ho kareter urjénsia ne’e.
Aliende ne’e Bankada FRETILIN konsege rekolla faktus no informasaun hodi aprezenta relasiona ho prosesu hili kompaña Sali-Magu Unipessoal Lda hodi sosa aimoruk.
“Iha loron 6 fulan setembru 2023, SAMES, IP hato’o pedidu autorizasaun ba Ministra Saude konaba nesidade ai-moruk, material konsumaveis, no sasan hospital ba hospital nian hamutuk 946 items atu sosa ho urjensia ho orsamentu rektifikativu ne’ebé aprova iha loron 25 fulan agustu 2023 ho montante US$ 6,000,000.00. Tuir dekretu lai nú. 18/2015, ne’ebé aprova kriasaun SAMES IP no nia estate, hodi regula katak SAMES IP iha kompetensia eskluziva ba sosa aimoruk no produtu farmaseutika, armazena no distribui. Maibe Sra. Elia dos Reis Amaral, Ministra Saúde deside halo prosesu aprovizionamntu rasik ba sosa ai-moruk ne’e.

Iha loron ne’e kedas, 6 setembru 2023, Sra. Ministra Saude liu husi despaixu nú. 11/MS/IX/2023, indika Kompaña Sali-Magu Unipessoal Lda ho razaun iha kapasidade atu sosa ai-moruk, mesmu Sali-Magu iha deit esperensia iha area konstrusaun maibe la iha esperensia sosa ai-moruk. Liu husi despaixu ida ne’e duni estabelese ekipa avaliasaun no husu atu haruka konvite ba Kompaña Sali-Magu hodi aprezenta caderno encargos no proposta.

“Kompaña Sali-Magu unipessoal Lda foin bele hetan lisensa atividade negosiu ba sosa ai-moruk nom produtu farmaseutika husi SERVE iha loron 8 setembru 2023 no hetan Lisensa Operasional ba Rejistu Importadora husi Ministeriu Saude iha loron 29 setembru 2023. Katak kompaña hetan tiha konvite mak foin trata nia lisensa atividade” hatete komunikadu.

Iha loron 18 fulan outubru 2023, Ministra Saude ho Kompaña Sali-Magu Unipessoal Lda ne’ebé reprezenta husi Sansão Gomes nu’udar diretor asina kontratu ho valor US$ 5,999,990.07, no kompomete atu hatama sasan tuir kontratu ne’e loron 40 hafoin asina kontratu, maibe realidade to’o agora kompaña seidauk bele hatama sasan.

Rate this item
(2 votes)

Independente Digital TV