DILI: Profesionál saúde hamutuk na’in 139 iha Munisípiu Baucau la kontinua sira-nia servísu tanba kontratu termina ona iha loron 31 fulan Dezembru tinan 2023.
Tuir Diretór Servísu Saúde Munisípiu Baucau, Domingos Reinaldo Guterres hatete, profesionál saúde na’in 139 ne'e kompostu husi rejime espesiál 124 no rejime jerál hamutuk na'in 15, ne'ebé durante ne'e hala'o kna'ar iha sentru no postu saúde inklui motorista ambulánsia iha Munisípiu Baucau.
“Ita-nia profesionál saúde 139 iha Munisípiu Baucau sei la kontinua sira-nia servisu tanba sira-nia kontratu termina ona iha fulan-Dezembru, ho nune'e fo impaktu tebes ba iha atendimentu públiku nian iha fasilidade saúde sira, liuliu ba motorista sira ne'ebé mak halo atendimentu loron-kalan, hodi transfere pasiente sira ba-mai iha fasilidade saúde sira," dehan diretór liu husi via-telefone, Domingu (14/01).
Nia dehan, Rejime espesiál antes ne'e, kontratu husi Ministeriu Saúde (MS) hamutuk na’in 124 ne'ebé hala'o kna'ar nu'udar implementadór programa no atendimentu komunidade iha postu no sentru saúde sira, hodi apoiu epidemiolojia ne'ebé kontratu liu husi fundu Covid-19 no Orsamentu Jeral Estadu (OJE).
Tanba ne'e, Sira hato'o ona pedidu ba iha MS, atu nune'e estende maibé to'o agora la hetan resposta.
Servisu Saúde Munisípiu Baucau kontinua esforsu hodi hato'o pedidu ba MS no autoridade Munisipál, atu solusiona problema refere tanba konsidera funsionáriu hirak-ne'e importante hala'o servisu iha terenu.
Nia hatutan, problema kontratu funsionáriu hirak-ne'e fó impaktu ba atendimentu públiku, liuliu aumenta servisu dupla ba funsionáriu kontratu sira, iha baze nune'e labele foka tuir área esensiál sira.
Nia informa, tuir informasaun ne'ebé mak postu saúde iha Suku Bualale, Postu Administrativu Kelikai, dehan taka ne'e informasaun laloos, maske pesoál saúde sira iha ne'ebá termina ona sira-nia kontratu, maibé kada semana pesoál saúde sira iha Sentru Saúde Kelikai sempre halo rotasaun hodi ba halo atendementu pasiente sira iha ne'ebá.
