Xefe Departamentu Tranzitu Seguransa Rodaviariu Nasionál, Superintendente Asistente Polisia Luis da Costa informa, iha 11 Setembru 2024, peregrinu husi Ermera hetan asidente iha area Railaku ne’ebé rejulta na’in haat hetan kanek todan no na’in 19 hetan kanek kaman.
"Iha loron 11 Setembru ita rejista kazu insidente ida kareta truck ida tula ita-nia sarani husi Dili fila ba Munisípiu Ermera mak iha dalan hetan asidente, iha area Railaku nian, tanba kareta ne'e nia kondisaun mak la di'ak,” informa nia liu husi konferensia imprensa iha edifisiu Kuartel Jerál PNTL, Kaikoli, Segunda (16/09).
Iha momentu asidente ne’e akontese, nia dehan, vitima sira balun evakua kedas ba sentru saúde Munisipiu Ermera no na’in haat ne’ebé hetan kanek todan evakua ba Hospital Nasionál Guido Valadares (HNGV).
"Kazu indente ne'e nia prosesu daudaun ne'e ita-nia Polísia Tranzitu Munisipiu Likisa halo hela investigasaun, depois polísia sira sei halo koordenasaun, fasilita malu halo prosesu to'o rohan," katak nia.
Iha fatin ketak, Lusia Madeira ne’ebé nia inan hetan asidente hatete, nia inan daudauk ne’e ninia kondisaun di’ak ona hafoin hetan operasaun.
"Ama-nia kondisaun normál no tanba operasaun horseik, agora ema hamoos ona no liman suku ne'e mós di'ak ona. Book aan mak ladun di'ak tanba operasaun iha liman karuk mak tohar, la tohar makas maibé tohar iha liman ruin ne'ebé uza besi haat," nia informa.
