Komandante Operasaun Komandu Jerál (PNTL) Superintendente Xefe Polísia José Soares hateten fatin altar Santu Tasi-Tolu dadauk ne'e forsa konjunta PNTL ho F-FDTL kontinua asegura seguransa, nune'e evita sarani sira labele estraga fatin sagradu ne'e.

"Agora dadaun husi parte PNTL ita koloka Polisia iha ne’eba liu husi Unidade Espesial Polísia atu bele tau matan asegura fatin altar Santu Tasi-Tolu hodi hein desizaun Governu deside katak intrega ba parte  atu aseguru fatin santu, depois mak ami bele Retira husi fatin ne'e," Dehan José ba Jornalista sira iha komferensia imprensa iha Kuartel jerál PNTL Kaikoli (16/09).

Nia dehan fatin Tasi-Tolu ne'e sai ona altar Santu,  tanba Amu Papa na'in rua maka halo ona  misa santu iha fatin ne'e, entaun ema hotu tenki kuidadu fatin ne'e nu'udar fatin sagradu ba Timoroan sira atu halo orasaun.

"Ita hotu haree misa solene iha Tasi-Tolu iha loron 10/09 ne'e ita asiste, balada manu fuik sira sei sai husi nia knuk atu fó ksolok iha fatin santu ida ne'e ita timoroan hanesan  sarani, ita tenke tau matan nafatin asegura fatin ne'e atu sai nafatin santu manas nafatin fo isin di'ak fo komok matak malirin mai ita liu-liu mensajen amu papa husik hela ba ita Timoroan atu halo tuir iha vida moris tomak," informa nia.

Nia dehan fatin altar Santu Tasi-Tolu iha misa solene Amu Papa Francisco husik hela mensajem furak ba Timoroan hotu liu liu ba labarik sira mak sai futuru joven sira atu kria Pás ferik katuas sira sai memoria ba rai ida ne'e, entaun tempu ona ba Timoroan atu respeita hadomi malu nu'udar ran Timor-Leste nian, entaun fatin ne'e presiza ema hotu kuidadu tau matan hanesan fatin Santu.

"Liafuan ne'ebé maka amu papa husik hela labele husik let de'it tau iha ulun iha fuan hatudu iha pratika, hahalok inimigu sira hatudu husi emosional ita la dumina ita nia an hodi hatudu forsa ba malu hases ona husi ita, mai husi esperitu foun korajen atu perdua malu buka malu atu buat ne’ebé ladiak ita tau hamutuk hanoin ita lao ba oin, ita tenke hatudu ita nia hahalok ida iha pratika hodi bele doko fali mundu seluk tau matan ba ita depois  papa vizita ita nia rai ida ne'e," afirma nia.

Tanba ne'e  fatin altar Santu Tasi-Tolu, Autoridade Seguransa PNTL kontinua tau seguransa iha fatin ne'ebá para asegura ema labele estraga, maibé lataka dalan Sarani Timoroan sira bele ba halo orasaun tuir fiar Igreja Katólika nian.

"Ha'u aproveita atuliza ba sarani sira halo orasaun iha loron saida de'it, maibe fatin ida ne'e fatin santu kuidadu atu labele soe foer arbiru iha fatin santu ne'e no ita rasik mak hatudu fatin ne'e santu no ita maka hasantu duni fatin ida ne'e, hatudu ba rai seluk katak, ita mós bele," Subliña nia.

Iha fatin hanesan  Komandante komponente Forsa Terrestres Koronél Domingos da Costa Soares "Dobu" hateten, Militár ne'ebé apoiu seguransa ba Vizita Amu Papa Francisco mai Timor-Leste koloka iha fatin sira hotu ne'e Retira fila hikas ona ba baze militar nian, maibe kompaña ida husi komponente Forsa Terrestres ne'ebé destaka iha fatin altar Santu Tasi-Tolu mak seidauk Retira kontinua apoiu PNTL Asegura seguransa ba fatin altar Santu ne'e to'o hein desizaun husi Governu.

"Iha fatin altar Santu Tasi-Tolu, ami sei hela nafatin iha ne'ebá ho Kompaña ida ne'ebé sei fó apoiu nafatin ba PNTL atu asegura fatin ne'ebá, hein orientasaun husi altu nivel sira bainhira los ona mak ami atu intrega, maibe ami rona mos informasaun katak ami mos apoiu halo lutu ho seguransa depois sei halo servisu seguransa PNTL atu halo lutu ba fatin altar santu ne'e hotu," hakotu nia.