“Konstrusaun eskola EBC Fatuhada ne’e ita haree 60%, tanba iha andar okos ne’e taka hotu ona no hein kompleta tan ida leten no no mós uma ida seluk hein kompleta tan nia parede sira, garante katak sei termina iha tinan ne’e, espera janeiru tinan oin bele entrega ba ita nune’e bele utiliza ba prosesu aprendizajen,” nia dehan iha nia knar fatin Fatuhada, Segunda (16/09).

Konstrusaun foin atinje 60% tanba iha VIII Governu nian ne’e, la’o tarde tanba bainhira ADN mai haree, ME lamai, nune’e mós hanesan ME mai tiha ADN lamai. Entre prosesu kontrusaun ne’e lori tinan rua.

“Uma ne’e iha mudansa ona tanba nia airin harii hotu ona, hein kompleta nia parede, reboka, nahe no taka nia kakuluk sira. Uma rua ne’e iha sala-de-aula hamutuk 12, uma ida ho sala-de-aula neen, okos tolu no leten tolu mós, no iha mós haris fatin ketak-ketak”, nia dehan.

Nia dehan sala-de-aula ne’e sufisiente ona hodi bele akumula estudante hosi primeiru anu to’o sestu anu. Antes ne’e sala-de-aula la to’o maibé ho konstrusaun foun ne’e bele ona.

“Ita sei fahe turnu rua, dadeer ho lorokraik, tanba iha estudante hamutuk 1,242. Ida-ne’e sufisuente ona ba ami,” nia dehan.

Entretantu empreza Betuhei Unipesoal Lda, mak konstrui EBF Fatuhada, ne’e hahú iha12 Outubru 2023 to’o 2024 mak kuaze tinan rua ona, prolonga dala rua ona. Orsamentu ba obra ne’e hamutuk $727,422,58.