Provedór Direitus Humanus no Justisa, Virgilio Guterres ‘Lamukan’ hatete, PDHJ kotinua akompaña prosesu eviksaun ne’ebé governu halo desde tinan kotuk to’o ohin loron.
Tuir PDHJ nia obrservasaun, despeza administrativu ka eviksaun ne’ebé ekipa governu lidera husi SEATOU halo ba komunidade sira nu’udar violasaun grave ba Direitus Umanus (DU)
"Violasaun direitus umanus grave hasoru ita-nia komunidade tanba família barak, feto no labarik ki'ikoan sira lakon sira-nia hela fatin, entaun situasaun ida ne'e iha tempu udan,” dehan Lamukan ba jornalista INDEPENDENTE, iha edifisiu Ministériu Finansas, Aitarak Laran, Dili, Segunda (20/01).
Tuir nia, bainhira atu sobu komunidade nia uma, maske uma ne’e aat, maibé uma ne’e sai hanesan komunidade nia abrigu iha tempu naruk, nune’e se atu ba hasai sira tenke iha medida atu proteze sira.
Nia fó ezemplu, hanesan projetu foun ruma atu harii sempre ba tau kalen no taka, nune'e projetu remata foin sobu fali kalen sira ne'e.
“Entaun nune'e mós loloos aplikasaun ba prosesu eviksaun,” dehan nia.
Daudauk ne’e, PDHJ análiza hela dokumentu kona-ba sobu negosiante sira iha estrada ninin no eviksaun molok hato’o ba ministériu relevante.
"Buat ne'ebé mak ami sei buka halo análiza ne'e mak iha aspetu boa governasaun ida ne'e nian, atu haree katak SEATOU ho Ministériu relevante halo diálogu ka lae ho komunidade molok atu ba hasai no sobu negosiante sira iha dalan ninin," dehan Lamukan.
PDHJ, nia hatutan, iha komunikasaun entre entidade responsabel sira no Ministériu sira, liu-liu kona-ba eviksaun iha Fomentu I no II nian iha faze análiza ba relatóriu.
“Kuandu análiza hotu sei haruka ba Ministériu relevante,” dehan nia.
PR Horta iha direitu hato’o keixa
Jurista Timoroan, Sergio Dias Quintas konsidera Prezidente Repúblika, José Ramos Horta, iha direitu tomak atu halo keixa ba Ministériu Públiku (MP) kontra Sekretáriu Estadu Asuntu Toponímia no Organizasaun Urbana.
Sergio dehan, lei la proibi atu Horta hato’o keixa ba MP nu’udar sidadaun ka nu’udar Xefe Estadu.
Nia hatutan, PR Horta iha direitu fundamentál ne'ebé konsagra tiha ona iha norma prosesual penal.
“Ne’ebé nia bele hato'o keixa atu kontra kualkér membru governu, ida ne'e direitu Prezidente Repúblika nian, hanesan sidadaun ida ka nu'udar Xefe Estadu nia bele hato'o keixa kriminál ka denunsia kriminál ba Ministériu Públiku.”
“Importante mak orsida keixa ka denunsia ba Ministériu Públiku depois mak ita hein konkluzaun Ministériu Públiku nian, tanba ita hatene katak saida mak ohin loron membru governu liu-liu SEATOU ne'e sai problema ida ne'ebé hamosu preokupasaun ita-nia sosiadade, la'ós sosiadade de'it mais entidade, liu-liu Prezidente Repúblika mós preokupa ho atuasaun ida ne'e,” dehan Sergio.
Sosiédade sivil apresia
Peskizadór Asia Justice And Rights (AJAR), Inocencio de Jesus Xavier, apresia ba PR Horta ne’ebé hato’o keixa hasoru SEATOU.
“Normalmente Prezidente Repúblika halo buat ida ne'ebé di'ak atu bele fó xamada ba Sekretáriu Estadu Asuntu Toponímia no Organizasaun Urbana hodi kumpre lei no orden.”
“Dala-barak SEATOU dehan kumpre lei no orden mais nia asaun la kumpre lei no orden. Kumpre lei no orden ne'e atu proteze, asegura, SEATOU dala-barak se nia hirus-matan so nia de'it mak bele halo buat ne'e iha Timor," dehan nia.
AJAR dejeza katak keixa ne’ebé PR Horta hato’o ne’e sei iha duni ninia rezultadu.
Direitór Asosiasaun HAK, Feliciano da Costa Araújo apresia mós ba asaun ne’ebé PR Horta foti.
Tuir nia, PR Horta no sidadaun hotu-hotu iha direitu atu hato’o keixa bainhira hasoru asaun ruma ne’ebé konsidera la di’ak ka la justu.
"Intensaun Prezidente Repúblika nian ba ami louva tebtebes, ne'e intensaun ida di'ak, agora mak ita haree fila fali entre Primeiru Ministru depois mai iha Parlamentu Nasionál, keta halo parlamentu ida ne'ebé maiória sira hatete ‘ne'e ami-nia membru governu ida’, Primeiru Ministru mós hatete ‘ne'e ha'u-nia elementu ida’ ka ‘ha'u ninia liman ain ida nusa mak Prezidente Repúblika halo buat ida ne'e’.”
“Hanesan intervensaun polítika sira balun ne'e bele hamate fila fali saida mak Prezidente Repúblika nia insiativa hakarak hato'o keixa ba Ministériu Públiku. Ami-nia espetativa mak ne'e inisiativa di'ak, tenke kontinua halo ida ne'e ba oin," katak nia.
Molok ne’e, Prezidente Repúblika, José Ramos Horta, hato’o keixa ba Ministériu Públiku kontra Sekretariu Estadu Asuntu Toponomia no Organizasaun Urbanada, Germano Santa Brites Dias, tanba konsidera asaun ne’ebé Sekretariu Estadu ne’e halo viola lei.
“Sim, ha'u aprezenta duni, ha'u aprezenta (keixa) dala rua ba PJR, hamutuk ho PDHJ,” dehan Xefe Estadu ne’e ba jornalista sira hafoin partisipa selebrasaun tinan foun Lunar, iha salaun Multiuzus-GMN, Bebora, Sesta (17/01).
Konteudu husi keixa ne’e, PR Horta husu ba Prokuradór Jeral Repúblik (PJR) atu haree didi’ak kompetensia legal husi SEATOU ba eviksaun ne’ebé nia hala’o.
“Sim, buat ne'ebé, primeiro haree didi'ak buat ne'e laos kompeténsia legál Sekretáriu Estadu Asuntu Toponímia no Organizasaun Urbana nian. Haree didi'ak lei, nia (SEATOU) lee didi'ak lei, ne'e lá'os nia kompeténsia, nia vióla ona lei, governu vióla ona lei, ne'e lá'os nia papél,” dehan Horta.
PR Horta hatete, hotu-hotu konkorda katak sidadaun sira labele okupa illegal ba fatin ne’ebé estadu presiza. Maibé, labele halo fali diskriminasaun.
“Balun haree iha Metiaut ne'e okupa, entaun la book ida, maibé book fali ema sira ne'ebé kiak ne'e”.
Tan ne’e, Xefe Estadu ne’e husu ba governu atu tenke fó duni kompensasaun ba komunidade sira ne’ebé afetadu.
Aleinde ne’e, PR Horta hato’o mós ninia lamentasaun ba envolvimentu Forsa Armada iha eviksaun.
“Ha'u la konkorda mak lori Forsa Armada, entaun signifika la konfia polísia, entaun buat oan nune'e tenke lori Forsa Armada, la lori polísia, entaun buat ruma boot liu fali lori saida? Purtantu, Forsa Armada, Forsa Armada nia fatin, polísia, polísia nia fatin lalika kahur demais buat rua ne'e, se la'e buat hotu-hotu polísia-militár tenke tama,” dehan nia.
