Deputadu Oscar dehan, loloos Saudozu Rui Fernandes husi Atsabe, Munisipiu Ermera, la merese hetan grau 3 tanba saudozu nu’udar membru fundadór ASDT no FRETILIN.

"Rui Fernandes husi Atsabe ne'e labele hetan (grau) 3 a 7, tanba problema ne'e, ema ne'e membru fundadór ASDT depois mai tan fundadór Fretilin nian, depois ita fó rekoñesimentu ida ne'e, kuitadu, ne'e ofensa ba nia familia sira. Ne'e mak ha'u husu Vise (Ministru) favór ida haree asuntu ne'e tanba ita-boot nia maluk," dehan Oscar iha ninia intervensaun iha plenária Parlamentu Nasionál, Segunda (20/01).

Rui, deputadu ne’e dehan, dadur dala-barak ho nia hodi hala’o servisu to'o mate, tanba ne'e husu atu tau konsiderasaun.

"Se bele rezolve tiha iha fulan rua nia laran par hanesan ne'e labele fó hanoin ida katak ema la halo servisu ba rai ida ne'e, ema ne'e mate saugate de'it," dehan nia.

Iha fatin hanesan, Deputadu CNRT Domingos Augosto ‘Deker’ hatete, nia koñese saudozu Rui.

"Ha'u atu responde preokupasaun ha'u-nia maun Oscar Lima nian ne'ebé liga liu ba saudozu adjuntu Rui Fernandes nian, ha'u hanesan Atsabe-oan ha'u hatene see mak Adjuntu Rui Fernandes, maibé hanesan esplikasaun ne'ebé ha'u halo ona katak ema ida la halo rekomendasaun maibé sita de'it ema idaidak nia realidade nune'e sistema mak sei halo kontajen," dehan nia.

Prezidente Komisaun F trata Asuntu Saúde, Seguransa Sosiál no Igualdade Jéneru, Maria Gorumali Bareto apresia tanba governu fó sai ona dadus verifikasaun veteranus tinan 2009 nian.

"Ha'u apresia tanba fó sai naran sira ne'e ba públiku atu maluk veteranu sira haree didi'ak lista naran sira ne'e karik la satisfas bele halo reklamasaun ba situasaun dedikasaun ne'ebé mak iha la tuir ita-boot sira-nia partisipasaun," dehan nia.

Karik mosu falsifikasaun ruma, ida ne'e tempu ida ne'ebé di'ak tebes ba veteranu sira atu halo reklamasaun bazeia ba lei ne’ebé iha.