Provedoria Direitus Humanus no Justisa (PDHJ) iha ninia monitorizasaun nota problema balun ne’ebé mosu tanba desizaun balun ne’ebé lideransa iha MS foti.

Provedór Virgilio da Silva Guterres hatete, iha PDHJ ninia monitorizasaun ba prosesu sosa aimoruk nian nota katak prosesu aprovizionamentu entre MS ho ajensia hodi sosa aimoruk la’o la di’ak.

"Iha ami-nia rezultadu monitorizasaun ne'e konklui mak ne'e, primeiro ami nota katak koordenasaun Ministériu (Saude) ho ajensia sira ne'ebé responsavel ba atu halo aprovizionamentu sosa aimoruk ladun lao di'ak," dehan Virgilio hafoin partisipa toma posse ba Diretor Ezekutivu Konsellu Imprensa (KI), iha salaun KI, Kintal Boot, Sesta (19/01).

Kazu falta aimoruk ne’e, nia dehan, mosu kedas iha tinan 2022 no to'o agora sei enfrenta hela tanba Ministériu ninia komunikasaun ruma ne'ebé atu sai laiha koordenasaun ho ajensia sira ne'e.

"Entaun ami haree iha aspetu ida ne'e, rezultadu husi monitorizasaun ne'e ida ne'e,” nia hatete.

Rezultadu seluk mak PDHJ haree katak desizaun la estende kontratadu profisional saude sira ne’e tuir lei loos maibé tempu mak la oportunu tanba mosu iha situasaun ida tranzisaun orsamentu, nune’e ninia implikasaun maka'as tebtebes no halo atendimentu saúde balun tenke paradu.

"Ida ne'e mak horisehik ami hato'o ba Vise Ministru Saúde ninian, liu-liu ba iha Asuntu Operasionalizasaun Ospitais ninian ne'e, atu dehan loloos ne'e Ministériu halo rekrutamentu ka ajustamentu uluk ba funsionariu sira depois mak deside atu la estede kontratu, nune'e labele fó implikasaun ba serbisu atendimentu," nia dehan.

Tanba, nia afirma, foti desizaun la estende kontratu ema rihun rua resin ne’e ninia implikasaun ne'e violasaun ba direitu sosiál sidadaun ninian, tanba atendimentu saúde ne'e tama iha kategoria direitu sosiál sidadaun nian.

“Katak direitu sidadaun nian atu hetan atendimentu ne'ebé ke apropriadu husi estadu no estadu, tuir Konstitusaun, komprometidu atu fó asistensia saúde ba sidadaun sira hotu.”

"Klínika sira barak taka la'os tanba aimoruk mak laiha, sira taka tanba rekursu (umanus)  mak laiha, tanba enfermeiru no ba ema sira ne'ebé uluk serbisu iha ne’ebá ne'e kontratadu, ne'ebé nia kontratu la estede,” dehan nia.

Virgilio informa mós katak, maske parte governu deklara Ministériu Saúde daudaun halo hela esforsu atu rezolve situasaun ne'e, maibé realidade sidadaun balun nia direitu violadu tiha ona.

“Esforsus bele kontinua halo maibé realidade katak sidadaun balun nia direitu violadu tiha ona," nia dehan.