Hakat ikus Ministru Amândio Featured

By Ekipa INDEPENDENTE Janeiru 22, 2024 798
Mate isin Saudozo Ministru Justisa Amândio de Sa Benevides, iha  HNGV, Dili. Foto:Dok.  Mate isin Saudozo Ministru Justisa Amândio de Sa Benevides, iha HNGV, Dili. Foto:Dok.

IHA 20 Janeiru 2024, hafoin simu hikas Primeiru Ministru, Kay Rala Xanana Gusmão, ne’ebé hala’o viajen ba Suiza, iha sala VIP aeroportu Komoro, Ministru Justisa, Amandio de Sá Benevides, teki-teki monu.

Iha Sabadu, hanesan membru governu ida, Ministru Amandio ho membru governu sira seluk hakat ba aeroportu Komoro hodi simu Xefe Governu ne’ebé fila hikas mai Timor-Leste.

Bainhira PM Xanana tuun husi aviaun, Ministru Amandio hamutuk ho membru Governu sira akompaña direta xefe Governu ba sala VIP nian.

Iha ne’ebá, Ministru Amandio ho membru governu sira halo konversa. Teki-teki teki Ministru Amandio monu.

Membru Governu no seguransa sira fó asisténsia hodi hatuur hikas no hatoba iha sofa leten, no hahú kontaktu ambulansia hodi bele lori ba HNGV.

 

Iis kotu iha dalan

Xefe Departamentu Emerjensia HNGV, Eldegar Lopes Martins informa, bainhira ambulansia to’o iha sala emerjensia iha 12.45 oras Timor-Leste (OTL), Ministru Amandio iis laiha ona.

"Ministru Justisa mate tanba atakasaun fuan, ne'ebé lori mai iha ospital seidauk to'o ne’e hakotu ona iis iha dalan klaran, ne'ebé to'o mai iha emerjensia ne’e iis laiha ona,” informa nia.

Maske iis laiha ona, maibé, nia dehan, doutor sira koko bomba nia fuan no nia konsege hetan fali iis, maibé la konsege salva ministru ne’e nia vida.

Kona-ba informasaun katak primeiru aimoruk segura iha aeroportu laiha no aimoruk ba atakasaun fuan iha HNGV laiha, Diretór ne’e dehan, iha aeroportu laiha duni kondisaun maibé iha HNGV aimoruk ba atakasaun fuan iha hela.

“Kona-ba aimoruk primeiru liña ba atakasaun fuan ne'e iha HNGV stock iha hela, maibé ambulansia to'o tarde iha aeroporto, entaun ida ne'e mak implika ba matebian nia vida, seidauk to'o mai iha HNGV nia hakotu ona iis iha dalan klaran,” dehan nia.

 

Governu lakon ema potensial

Primeiru Ministru, Kay Rala Xanana Gusmão, sente triste no lakon ema pontensiál ida ne’ebé assume kargu importante nu’udár Ministru Justisa iha Governu Konstitisionál dasia.

Xefe Governu sente lakon tanba maktoban halo duni servisu todan boot ida hamutuk ho ekipa tékniku sira hodi konsege rezolve problema kaderneta pasaporte Timor-Leste nian iha  fulan hirak nia laran.

“Triste tebes tanba ha’u asiste, bainhira tuun husi aviaun ha’u sei konversa hela ho sira hotu, ha’u ko’alia mós ho Ministru Amandio. Ha’u husu sira hotu nia kondisaun, ami na’in rua sei hamnasa hela, kaer liman, ami la’o hamutuk tama sala VIP, derrepenti hetan atakasaun. Ami hotu preokupadu,” dehan PM Xanana liu husi komunikadu ne'ebé jornal INDEPENDENTE asesu husi media Gabinete PM, Domingu (20/01).

 

PR Horta triste

Prezidente Repúblika, José Ramos Horta, hato’o mós ninia sentimentu tristeza ba Ministru Amandio ne’ebé husik ona mundu ne’e.

“Husi irmaun Benevides sira, Francisco no Evaristo mate tiha ona. Aman, Liurai Benevidas dé Maubisse, haka'as an atu eduka ninia oan hotu. Ami kolega sira iha Misaun Katolika Soibada. Liurai mak figura ida ne'ebé folin-boot no respeitu tebes.”

“Ha’u hala'o sorumutuk serbisu nian ho Ministru Amandio, ne'ebé sempre aten-barani no koko atu rezolve problema hotu ne'ebé nia hasoru. Triste tebes. Lakon boot ba Timor-Leste," dehan PR Horta liu husi ninia pajina facebook, Sabadu (20/01).

Entretantu, Ministru Amandio moris iha 16 Jullu 1964. Nia husik hela feen kaben ho oan na’in haat, kompostu husi mane na’in tolu no feto ida.

Rate this item
(2 votes)

Independente Digital TV