Desizaun hodi la autoriza estensaun ba viza ne’e tanba deskonfia SW ne’ebé nu’udar ativista husi Papua mai iha Timor-Leste atu halo asaun solidariedade ba Papua durante vizita Amu Papa Francisco iha Timor-Leste.
Provedór Virgilio dehan, bainhira nia simu informasaun kona-ba autoridade Migrasaun Timor-Leste asegura aktivista Papua ida, nia komunika kedas ba Ministru Interiór hodi husu klarifikasaun.
"Ha'u hatete ba Ministru Interior (katak) ha'u lamenta ho situasaun ida ne'e, entaun ha'u dehan ba Ministru Interior ‘halo detensaun, asegura sidadaun estudante ativista Papua ne'e nia halo violasaun saida no nia vistu mak liu loron ona ho dokumentu ruma mak la kompletu.”
“Maibé Ministru Interior hatete tuir loloos ne'e sidadaun estudante ativista Papua ne'e fila ona ba nia rain iha 24 Agostu, maibé nia hakarak estende tan nia vistu atu hela iha Timor-Leste mak ita asegura nian hodi halo prosesu atu haruka fila," dehan Virgilio ba jornalista sira iha salaun PDHJ, Kaikoli, Kinta (29/08).
Tuir lei, Provedór ne’e dehan, sidadaun estranjeiru ne’ebé tama iha Timor-Leste husi loron 15 to’o fulan ida, bele hato’o pedidu estensaun. Maibé, nia kestiona, tanba sa mak bandu fali ativista Papua ne'e.
"Ha'u hanesan Provedor Direitus Humanus hakarak hatete, ita labele viola ema-nia direitu no limita ema ruma hakarak hato'o espresaun ruma, ne'e direitu ema nian, ita labele bazeia de'it ba ita-nia intensaun ho preokupasaun sira.”
“Autoridade halo asaun asegura sidadaun, ema ruma, tenke bazeia ba lei no Konstituisaun RDTL. Ezemplu, sidadaun estudante aktivista Papua ne'e nia la viola buat ida, entaun ita labele kondena no akuza nia, tanba husi Papua nia tama mai Timor-Leste ne'e atu halo manifestasaun solidaridade," katak nia.
Tuir nia, manifestasaun ne’e bazeia ba lei, tan ne’e autoridade sira mak tenke asegura asaun manifestasaun ne'e labele perturba fali vizita Amu Papa Francisco.
“Laos sidadaun (estranjeiru) husu atu estende nia vistu fulan ida, autoridade asegura, halo prosesu haruka fila, ida ne'e viola ema-nia direitu. Ita labele asegura ema ida bazeia ba ita-nia imajinasaun, ita tauk, bandu ema hotu labele halo manifestasaun, ida ne'e violasaun direitu umanu," nia afirma
Molok ne’e, Forsa Konjunta Timor-Leste asegura ativista husi Papua ho inisial SW ne’ebé deskonfia sei halo asaun balun durante vizita Amu Papa Francisco iha Timor-Leste.
Tuir informasaun ne’ebé INDEPENDENTE asesu, iha 26 Agostu tuku 15:40 oras Timor-Leste, ekipa operasaun konjunta SIP no SIM ho apoiu husi autoridade Servisu Migrasaun halo aprosimasaun ba sidadaun Indonezia husi Papua ne’ebé loloos tenke sai ona husi Timor-Leste iha 24 Agostu ne’e.
Sidadaun Indonezia ne’e fó razaun katak nia seidauk fila tanba kondisaun saude la permite.
Enkuantu, tuir informasaun, ativista husi Papua ne’e tama iha Timor-Leste iha 11 Agostu liu husi aeroportu Komoro ho viza turista.
“Mahasiswa husi Papua inklina aan iha ativista no objetivu vizita mai Timor-Leste atu tuir atividade balun durante loron tolu iha Timor-Leste no ema ne’ebé sei partisipa hamutuk 23 husi nasaun sira ne’ebé entre ligadu, no topiku ne’ebé sira sei kolia durante loron tolu nia laran mak kona-ba direitus uamanus,” sita dokumentu balun ne’ebé INDEPENDENTE asesu.
Ba kestaun ne’e, Jornalista INDEPENDENTE koko halo konfirmasaun ho Diretora Jerál Servisu Migrasaun Timor-Leste, Inspetor Xefe Polísia Adelaide da Rosa, maibé seidauk bele fó komentáriu tanba okupadu ho servisu.
Entretantu, daudauk ne’e sidadaun Indonezia ne’e sei iha hela prosesu identifikasaun.
