Iha 29 Agostu, tinan ne’e, iha tuku sia oras Timor-Leste, autoridade seguransa Timor-Leste halo operasaun hodi asegura sidadaun Australia ida.

Tuir informasaun ne’ebé Jornalista INDEPENDENTE asesu, autoridade asegura sidadaun ho sexu feto ne’e tanba deskonfia poster no espanduk ne’ebé prepara ne’e sei uza ba asaun pasifiku hasoru Sekretariu Jeral Nasaun Unidus, Antonio Guterres, iha serimonia loron Konsulta Popular, 30 Agostu ne’e.

“Ekipa operasaun konjunta hamutuk ho Departamentu Investigasaun Kriminál Nasionál halo operasaun kona-ba spnaduk no mós poster ne'ebé  sidadaun estranjeiru Australianu feto ida imprime iha fatin imprime ida iha area Bairo Sentrál, ko'alia kona-ba Papua merdeka no solidaridade internasional ba Palestina no Sahara Osidental,” informa fonte ida ba Jornalista  INDEPENDENTE, Kinta (29/08).

Iha prosesu identifikasaun, ativista Australia hatete katak poster no spanduk hirak ne'e sira sei utiliza maibé la’os atu halo demostrasaun.

“Informasaun ne'ebé espalla iha terenu katak iha loron 30 Agostu, grupu sira ne'e sei loke spanduk ba mundu internasional kona-ba Papua, Palestina no Sahara Osidental,” informa fonte ne’e.

Hafoin identifikasaun, autoridade haruka ativista Australia ne’e fila ba uma.