Xefe Jestór Merkadu Taibesi Carlos Borgues da Silva hatete, kada loron ekipa jestaun sempre aviza bebeik ba negosiante no vendedór sira, atu labele fa’an sasan iha li'ur maibé sira la rona.

Tanba ne’e, hanesan Xefe Jestór Merkadu Taibessi oreinta nia ekipa hodi halo asaun hirak ne’e hasoru negosiante sira, tanba negosiante hirak ne’e estadu kria ona fatin ba sira hodi fa’an sira nia produtu sira.

“Inan-aman no maun alin sira ne’ebé halo aktividade iha merkadu Taibessi la’os foin mak atu avizu de’it lae, loron-loron fulan tinan avizu hela de’it mos sira nunka rona taka tan sirkulár mós sira nunka rona tan ne’e hanesan xefe hamutuk nia membru sira halo aktividade ho rigorozu ida hanesan ne’e,” dehan Xefe Jestor ba Jornalista Televizaun INDEPEDENTE iha Merkadu Taibesi, Segunda (02/09).

Xefe Jestór ne’e hatutan, governu nunka bandu nia povu atu fa’an sasan sira iha merkadu, maibé iha mós fatin ne’ebé bele fa’an no iha fatin balun ne’ebé labele atu fa’an sasan bá.

Nia dehan, Jestór husi merkadu Taibesi nia destaka ona nia ekipa sira, hodi hein iha portaun atu nune’e bele kontrola negosiante sira, labele fa’an sasan sai ba iha portaun liur.

Maibé Jestaun Merkadu mós autoriza negosiante sira atu fa’an sasan iha liur iha loron sabadu no domingu, enkuantu husi Segunda to’o Sesta hotu-hotu tenki fa’an iha fatin ne’ebé governu prepara ona ba sira.

Iha mós negosiante balun ne’ebé hatete ba hakilar katak hanesan povu ki'ik tuur iha merkadu la’os atu buka osan boot maibé atu buka de’it hahán ne’ebé atu han ba loron ida nian.

Tanba ne’e husu atu labele baku rahun sira nia sasan.
Enkuantu, tuir observasaun jornalista Televizaun Independente nia iha terenu nota katak, ekipa jestaun merkadu Taibessi nian iha segunda dader, mais ou menus tuku sanolu liu minutu balun, ekipa jestaun muda negosiante sira ne’ebé faan sasan iha trotoar leten no konsegue harahun negosiante sira-nia kadeira balun, inklui sasan balun ne’ebé fakar moos.