Deputada Bankada PD, Maria Teresa Gusmão hateten, asuntu kestaun saúde ne'ebé bankada PD hakarak levanta iha sesaun plenária ne’e.
"Ba dahuluk mak kona-ba asuntu saúde ne’e ha'u asesu iha tendensia pasiente moras komplikasaun no idozu sira, pesoál saúde sira ladún fó asistensia másimu, nune'e bele to'o iha situasaun sai grave", dehan nia, iha plenária PN, horisheik, (10/11/24).
Nune’e, iha sentru saúde no ospital sira inklui HNGV durante ne’e apoiu servisu tratamentu ba pasiente sira barak mai husi doutór kubanu sira, maibé ladun fó prioridade ba pasiente sira.
"Doutór kubanu sira dala-barak lokraik la tama servisu, tanba fó liu tempu hanorin estudante (husi universidade) médisina sira, ne’e mos afeta servisu ba servisu saúde nian, liu-liu atendimentu ba pasiente sira", nia preokupa.
Da-toluk mak ba doutór espesialista sira ne'ebé Governu selu ho bolsu estudu ladun fó prioridade ba pasiente sira iha sentru saúde no ospitál sira. Sira fó liu tempu ba konsulta ema iha klinika privadu sira.
"Nune'e, pasiente sira ne'ebé tama bá kategoria grave ladun hetan atendimentu lalais husi doutór no médiku sira kualkér tempu perigu no moras todan", katak nia.
Aleinde ne’e, iha kazu pasiente ne'ebé moras grave no asidente todan bainhira telefone ba doutór espesialista sira la prezensa no fó de’it instrusaun liuhusi telefone ba enfermeiru ka doutór jerál.
"Enfermeiru no doutór hahu oras servisu tuku 14:00 lokraik la tama servisu, tanba foti oras estra ba hanorin estudante universidade ka institutu husi fakuldade saúde nian, nune'e afeta ba atendimentu pasiente sira", tenik nia.
‘Kelinci’ ba Estajiáriu
Purtantu, deputada Bankada PD hateten, iha atendimentu ba pasiente sira dala-barak doutór sira fo ba estudante universidade ne'ebé hala'o estajiu iha ospital no sentru saúde sira mak halo prátika hasoru pasiente sira, nune'e hatene segredu pasiente nian.
"Manorin saúde ka enfermeiru no doutór sira uza pasiente moras espesifiku nu'udar ‘kelinci percobaan’ (pratika) ba estudante sira halo estudu kazu no observasaun. Ne’e laiha étika ba segredu médiku pasiente… estudante lubuk feto ka mane ho observasaun ba inan-isin rua ne’e. Ne’e laiha étika tanba ita-nia isin la'os espozisaun," nia lamenta.
Tanba, nia hateten, tuir étika profisaun médiku estudante ne’ebé seidauk simu juramentu profisaun, liuliu ba estudante médiku jerál seiduak bele halo observasaun ba pasiente moras ho espesifiku.
"Pasiente iha direitu no segredu ba privasidade, ida ne’e mós sai kauza ida, tan ne’e pasiente barak hili ba klinika privadu tanba atendimentu ba moras di'ak liu, maski karun duque ba ospitál ne’e ho gratuita", katak nia.
Entretantu ba kestaun ne’e, husi parte Governu liuhusi Vise Ministru Asunto Parlamentar, Aderito Hugo da Costa, seidauk fa resposta no sei hato'o ba ministériu saúde atu haree ba kestaun ne’e.
