Portavoz SIJK Sergio Lobo hatete, sira na’in hitu ne’ebé pozitivu sira nia idade produtivu hotu, tanba ne’e sira nia kondisaun saúde di’ak.

Corona Virus ne’e to’o oras ne’e laiha aimoruk, nasaun barak maka koko ona aimoruk antiviral sira hanesan klorokin maibé seidauk iha rekomendasaun atu halo kompras masal, tanba ninia efeitu seidauk priense rekejitu sientifiku hatudu katak aimoruk ne’e maka kura moras ne’e.

“Moras virus ne’e ita halo de’it rekomendasaun ba sira atu deskansa barak, han hahán saúdavel atu sira nia sistema imunidade ne’e forte atu kombate virus ne’e,”dehan nia, iha Sala Sentru Media SIJK, iha CCD, ohin.

Sergio hatutan, ema sira ne’ebé mate tanba COVID-19 ne’e dalaruma mosu moras komplikadu, entaun tratamentu ne’ebé halo ne’eba moras komplikadu sira hanesan, mear karik fó aimoruk mear nian, ulun moras karik fó aimoruk ulun moras nian, isin manas karik fó aimoruk isin manas nian, karik dada iis ladi’ak fó aimoruk ajuda para dada iis, kuandu presiza bele uza ventilador atu uza hodi bele dada iis.

“Ita la fó aimoruk espesifiku, aimoruk ne’ebe ita fó ne’e hanesan tramentu kurativu, liu husi ne’e ita hein katak sira nia sistema imunidade ne’e maka sei kombate virus ne’e,”dehan nia.

Eis Ministru Saúde ne’e husu ema hotu atu reza, hein katak iha tempu badak sientista sira bele hetan ona aimoruk espesifiku atu nune’e bele uza hodi kombate moras ne’e.