Parlamentu Nasionál liu husi diskusaun iha espesialidade aprova ona osan privativu órgaun soberania lejizlativa ho votu afavor 40 kontra 3 no abstensaun 22, ho nune’e orsamentu privativu ho montante tokon $16.145 pasa.

Orsamentu privativu ne’e rasik sei koloka ba saláriu no vensimentu, bens no servisu, transferénsia publika, kapitál menór no kapitál dezenvolvimentu.

Deputadu Bankada FRETILIN, Maria Angelina Rangel hateten, debate orsamentu privativu ba Parlamentu Nasionál, liu-liu verba kona-ba sosa karreta foun ba membru deputadu sira ne’e lori diskusaun naruk, tanba ne’e husu atu halo proposta hodi elimina ba asuntu ne’e.

“Ita halo diskusaun naruk, tanba ne’e ami husu atu halo proposta hodi halo kortez ba osan sosa karreta, maibé meza la admite ami nia proposta”, dehan nia, iha Uma Fukun PN, horisehik.

Nia hateten, hanesan estrutura iha órgaun soberania ida, ne’e halo deklarasaun inkonsisténsia ko'alia iha públiku seluk iha prátiku halo mós buat seluk.

Iha fatin hanesan, Vise-Prezidente Parlamentu Nasionál, Luis Roberto hateten, problema karreta ne’e anteriór nian, karik eis-deputadu sira entrega karreta tuan sira ne’e, ohin loron la kria konfuzaun.

“Tanbasá ita la ezije ba eis-deputadu sira hatama karreta tuan sira ne’e, kuandu kompletu ita la presiza sosa fali karreta foun. Ita uza de’it ida tuan ne’e”, dehan nia.

Nia hateten, iha partidu boot rua hanesan FRETILIN ho CNRT, sira nia eis-deputadu balun mak lori karreta ne’e ba. Tuir loloos, sira tenke responsabiliza hodi husu atu lori fali mai.

Hataan ba kestaun ne’e, Prezidente Parlamentu Nasionál, Arõa Nóe de Jesus hateten, verba sosa karreta foun ba deputadu sira ne’e laiha proposta ida tama iha meza atu korta verba ida ne’e rasik.

Husi deputadu FRETILIN sira mak atu halo proposta atu hasai verba ne’e, maibé tama ona diskusaun sira husu atu intervalu hodi ba hakerek proposta ne’e rasik, ne’e lei la fó dalan tanba prosesu hotu ne’ebé la’o iha PN tenke tuir regra normál sira ne’ebé iha.

Arão hateten, orsamentu ba sosa karreta ne’e sai hanesan antesipasaun karik karreta tuan la hatama, entaun bele uza ba sosa karreta foun 31 ba deputadu foun sira.

Ne’e esforsu ida karik eis-deputadu sira hatama karreta sei la sosa karreta foun, tanba PN labele iha karreta ne’ebé dobru.