Xanana dehan, loron 20 Agostu nu’udar loron boot ba Falintil, tanba ne’e presiza ema hotu tenke presta omenajen ba sira.
"Itá hato’o parabéns ba F-FDTL no basa liman ba sira-nia loron, tanba ita husu ba sira atu isin di’ak nafatin hodi servi povu no rai doben Timor-Leste," dehan Xanana iha Oekusse, Kinta (20/08).
Iha fatin hanesan, xefe suku Malelat, Ze Marques, reprezenta povu RAEOA hato’o parabéns ba Falintil, liu-liu ba ofisial F-FDTL ne’ebé destaka iha RAEOA hodi garante seguransa iha fronteira.
"Ha’u reprezenta povu RAEOA, liu-liu ha’u ho ha’u-nia komunidade iha suku Malelat hato’o ami-nia parabéns ba F-FDTL no ami hakruuk ba imi nafatin, fó fiar hodi servi ba nasaun no ba ami hanesan lutu nasaun," dehan nia.
Entretantu, Xanana afirma katak asaun karidade ne’ebé nia halo durante ne’e tanba domin ba povu la’os tanba interese politiku.
Xanana hatete, hafoin implementasaun EE, limite ema labele halo movimentu no tenke hela iha uma, tanba ne’e Xanana ho inisiativa haleu munisipiu 12, inklui RAEOA, hodi ajuda kbiit laek sira, no mós halo kampaña hodi sosializa informasaun Covid-19 ba komunidade sira.
